Тошкентда Ички ишлар вазирлиги академияси ҳамда Туркия Республикаси Истанбул университети ҳамкорлигида семинар машғулотлари ташкил этилди. Бу ҳақда ЎзА хабар бермоқда.
Тадбир терроризм ва экстремизмга қарши курашишда Туркия билан тажриба алмашиш ва шу асосда икки мамлакат таълим муассасалари ўртасида ўзаро ҳамкорликни янада ривожлантириш мақсадида ташкил этилди.
Ички ишлар вазирлиги академияси бошлиғи Баҳодир Матлюбов, Истанбул университети профессори Мустафо Қараташ ва бошқалар Ўзбекистон ва Туркия Президентларининг учрашувларида эришилган келишувлар, бунинг натижасида турли соҳаларда ҳамкорлик ривожланиб бораётгани қардош халқлар фан, таълим, маънавий-маърифий ва бошқа соҳалардаги алоқаларни янада ривожлантириш учун ҳам кенг имкониятлар яратганини алоҳида таъкидлади.
Икки кун давом этган семинарда академия профессор-ўқитувчилари ва курсантлари «Терроризм ва диний экстремизмнинг жамият ҳаётига таҳдидлари», «Полиция таълим муассасаларида фиқҳ асосларини ўргатиш ва диний таълим бериш масалалари» мавзуларида маърузалар тинглади.
Тадбир доирасида меҳмонлар пойтахт, Бухоро ва Самарқанд шаҳарларининг диққатга сазовор жойларини томоша қилди.
Изоҳ (0)