O‘zbekiston Ichki ishlar vazirligi tizimida qator lavozim o‘zgarishlari sodir bo‘ldi. Davlat rahbari matbuot xizmati 12-fevral kuni Prezident Shavkat Mirziyoyev raisligida Ichki ishlar vazirligida bo‘lib o‘tgan yopiq yig‘ilish fonida kadrlar tayinlovi to‘g‘risida qarorlarni e’lon qildi.
Unga ko‘ra, general-leytenant Bahodir Ahmedovich Matlyubov Ichki ishlar vazirligi akademiyasining boshlig‘i lavozimidan ozod etildi. U ushbu lavozimda 2016-yil dekabridan ishlab kelayotgan edi. Matlyubov undan oldin ichki ishlar vaziri (2006–2013-yillarda) lavozimida ishlagan.
Rustam Abdug‘aniyevich Hotamov akademiyaning yangi rahbari bo‘ldi, shu munosabat bilan u 2018-yil avgustidan buyon egallab turgan ichki ishlar vazirining o‘rinbosari – Kadrlar bosh boshqarmasi boshlig‘i lavozimini tark etdi.
Yahyojon Ortiqboyevich Abdulhaqov ichki ishlar vazirining o‘rinbosari – Tergov boshqarmasi boshlig‘i etib tayinlandi. Ilgari u Andijon viloyati ichki ishlar boshqarmasi boshlig‘ining o‘rinbosari – Tergov boshqarmasi boshlig‘i lavozimida ishlagan.
Najmiddin Sadirovich To‘raxo‘jayev vazirning axborot texnologiyalari bo‘yicha o‘rinbosari etib tayinlandi. Ilgari u Vazirlar Mahkamasi huzuridagi Davlat personallashtirish markazini boshqargan.
Avvalroq Prezident Toshkent shahar Ichki ishlar bosh boshqarmasiga tashrif buyurgani haqida xabar berilgandi.
Izoh (0)