Жорий йилнинг 11—15 октябрь кунлари Пекин шаҳрида Хитой Халқ Республикаси Жамоат хавфсизлиги вазирлиги университетининг 70 йиллик юбилейи муносабати билан Х Халқаро полиция форуми бўлиб ўтди. Мазкур анжуманда дунёнинг ўттиздан зиёд давлатлари таълим муассасалари вакиллари, жумладан, Ўзбекистон Республикаси Ички ишлар вазирлиги Академияси делегацияси ҳам иштирок этди. Бу ҳақда ИИВ Матбуот хизмати хабар берди.
Ўзбекистон Республикаси ИИВ Академияси бошлиғи, генерал-лейтенант Баҳодир Матлюбов сўзга чиқар экан, ХХР Жамоат хавфсизлиги вазирлиги университетининг 70 йиллиги билан таълим муассасаси жамоаси ва меҳмонларни самимий қутлади.
Тадбир доирасида форум иштирокчилари учун Ўзбекистон Ички ишлар вазирлиги Академиясида кадрлар тайёрлаш тизими ҳақида маълумот берилди ва махсус видеофильм намойиш этилди. Шунингдек, анжуманда ХХР ЖХВ кадрлар бошқармаси бошлиғи ўринбосари, таълим муассасалари куратори Чен Янчао, Дания полиция университети умумий инсон ресурслари департаменти директори Петер-Крестен Экеберг ва бошқа йигирмага яқин давлатларнинг вакиллари маъруза қилди. Маърузаларда таълим соҳасида ҳамкорликни кенгайтириш, илғор тажрибаларни оммалаштириш, мутахассис кадрлар тайёрлаш жараёнида инновацион технологиялардан кенг фойдаланиш, таълимнинг замонавий шакл ва усулларини ҳуқуқни муҳофаза қилувчи органларнинг амалий фаолияти билан мослаштириш, кадрлар тайёрлаш, қайта тайёрлаш ва малакасини ошириш бўйича долзарб масалалар хусусида тўхталиб ўтилди.
Шу куни таълим муассасалари раҳбарлари яна бир янги лойиҳа – Полиция таълими соҳасида янги халқаро ҳамкорлик форуми ташкил этиш масаласини муҳокама қилдилар. Ушбу форумни ташкил этишдан мақсад таълим ва фан соҳасида ўзаро ҳамкорлик қилиш, жамоат тартибини сақлаш ва жиноятчиликка қарши курашиш соҳасида юқори малакали полиция кадрларини тайёрлаш, бу борада профессор-ўқитувчилар ва таълим олувчиларнинг малакасини ошириш ҳамда илғор педагогик технологиялар бўйича тажриба алмашишни йўлга қўйишдан иборат. Анжуманда йиғилганларга янги лойиҳанинг мақсад ва вазифалари ҳақида батафсил маълумот берилди ҳамда форум низомининг лойиҳаси муҳокама қилинди.
Анжуман доирасида ИИВ Академияси бошлиғи, генерал-лейтенант Баҳодир Матлюбов ХХР ЖХВ университети президенти Сао Шицюан билан учрашди. Томонлар икки давлат таълим муассасалари ўртасидаги ҳамкорликнинг бугунги ҳолати ва истиқболлари ҳақида мулоқот қилдилар. Хусусан, хитойлик мутахассислар томонидан ИИВ Академиясида барпо этилаётган Инновацион таълим фонди лойиҳаси ҳақида ўзаро фикр алмашилди. Айтиш керакки, мазкур лойиҳа Ўзбекистон Республикаси ҳамда Хитой Халқ Республикаси ҳукуматлари ўртасидаги келишув асосида амалга оширилмоқда. Инновацион таълим фондининг вазифаси Академия тингловчи ва курсантларига тегишли мутахассисликлар бўйича чуқур амалий таълим бериш ва уларда касбга оид, келажакда ўз хизмат вазифаларини муваффақиятли бажаришга имкон берадиган малака ва кўникмани ҳосил қилишдан иборат. Лойиҳага кўра Академияда Ситуацион полигон ҳамда Модуляция ва симуляция марказини ўз ичига оладиган иншоот қурилади.
Изоҳ (0)