Вазирлар Маҳкамасининг қарори билан Музаффар Комилов Ўзбекистон халқаро ислом академияси ректори лавозимига тайинланди. Бу ҳақда Дин ишлари бўйича қўмита матбуот хизмати хабар берди.
Уйғун Ғафуров эса бошқа ишга ўтиши муносабати билан академия ректори лавозимидан озод этилди.
4 декабрь куни Музаффар Комилов президентнинг дин ва миллатлараро муносабатлар масалалари бўйича маслаҳатчиси лавозимидан озод этилганди.
Комилов 2018 йилнинг апрелида Дин ишлари бўйича қўмита раисининг ўринбосари этиб тайинланганди. Давлат раҳбарининг махсус топшириғи ва тегишли қарорига асосан 2021 йил 25 майдан Музаффар Комилов Ўзбекистон халқаро ислом академияси ректори вазифасини бажарганди.
2022 йилнинг июнь ойида Музаффар Комилов президентнинг жамоат ва диний ташкилотлар билан ҳамкорлик масалалари бўйича маслаҳатчиси лавозимига тайинланганди.
2023 йилнинг сентябрь ойида Уйғун Ғафуров Ўзбекистон халқаро ислом академияси ректори лавозимига тайинланганди.
Ўзбекистон халқаро ислом академияси “Диний-маърифий соҳа фаолиятини тубдан такомиллаштириш чора-тадбирлари тўғрисида”ги Президент фармонига биноан 2018 йилнинг апрелида ташкил этилган.
Изоҳ (0)