Ўзбекистон бош вазири Абдулла Ариповни 12 май куни Эрон президенти Масъуд Пезешкиён қабул қилди. Бу ҳақда бош вазир матбуот хизмати хабар берди.
Маълум қилинишича, Ўзбекистон томони мамлакат делегациясига кўрсатилаётган меҳмондўстлик учун миннатдорлик билдириб, президент Шавкат Мирзиёевнинг йўллаган самимий саломи ва эзгу тилакларини етказди.
Учрашувда икки давлат раҳбарининг қатъий сиёсий иродаси туфайли ўзаро ҳамкорлик кенг қамровли муносабатлар даражасига кўтарилгани, олий даражада эришилган келишувларнинг амалий ижроси минтақа барқарорлиги учун ҳам муҳим экани алоҳида таъкидланди.
Шунингдек, икки томонлама муносабатларнинг устувор йўналиши бўлган савдо-иқтисодий ва инвестициявий, саноат кооперацияси, транспорт ва логистика, ҳудудлараро ҳамда маданий-гуманитар йўналишларда эришилган келишувлар ижросини таъминлаш масалаларига ҳам алоҳида эътибор қаратилди.
Теҳронга ташриф доирасида Эрон инновациялар ва технологиялар уйига ҳам ташриф буюрилиб энергетика, тиббиёт ва фармацевтика, қишлоқ хўжалиги, IT, қурилиш сингари соҳалардаги илғор маҳсулот ва ишланмалар билан танишилди.
Шунинг билан Ўзбекистон ҳукумати делегациясининг Эронга ташрифи якунланди.
Ўзбекистон ва Эрон ўртасида ҳар томонлама ҳамкорликни мустаҳкамлаш бўйича 2025—2027 йилларга мўлжалланган “йўл харитаси” имзолангани ҳақида хабар берилганди.
Ўзбекистон ва Эрон муносабатлари
Икки давлат ўзаро савдо ва юк ташиш кўрсаткичлари, қўшма корхоналар сони ошмоқда, пойтахтлар ўртасида мунтазам тўғридан тўғри авиақатновлар амалга оширилмоқда, ишбилармонлик ва маданий-гуманитар алмашинув кенгаймоқда. Ўзаро савдода барқарорлик кузатилмоқда. Хусусан, товар айирбошлаш ҳажми 500 миллион долларга етди, қўшма корхоналар сони 210 дан ошди. 2024 йил октябрида Эрон ва Ўзбекистон ўзаро товар айирбошлаш ҳажмини 10 баробарга ошириш мақсадида имтиёзли савдо билан шуғулланиш бўйича дастлабки келишувларга эришди.
2025 йил 1 апрель куни Шавкат Мирзиёев ва Эрон президенти Масъуд Пезешкиён телефон орқали мулоқот қилиб, Ўзбекистон—Эрон муносабатларини янада ривожлантиришнинг долзарб масалаларини атрофлича кўриб чиққанди. Унда кимё ва нефть-кимё тармоқлари, тўқимачилик ва озиқ-овқат саноати, қишлоқ хўжалиги, қурилиш материаллари тармоғи ва бошқа йўналишлардаги кооперация лойиҳаларини қўллаб-қувватлаш ва жадал амалга оширишга алоҳида эътибор қаратилди.
Икки давлат раҳбалари 2024 йилнинг октябрида Ашхободдаги халқаро форум доирасида учрашув ўтказганида ҳам Ўзбекистон билан Эрон ўртасидаги кўп қиррали муносабатларни ривожлантиришнинг долзарб масалалари муҳокама қилинганди.
Изоҳ (0)