Қозоғистон президенти Қосим-Жўмарт Тўқаев Самарқандга келди. Бу ҳақда Ўзбекистон бош вазири матбуот хизмати хабар берди.

Олий мартабали меҳмонни Самарқанд халқаро аэропортида Ўзбекистон бош вазири Абдулла Арипов ва бошқа расмийлар кутиб олди.

Маълумот учун, Ўзбекистон президенти Шавкат Мирзиёев раислигида Самарқанд шаҳрида “Марказий Осиё - Европа иттифоқи” биринчи саммити бўлиб ўтади.

Кутиб олиш маросимидан сўнг, Қозоғистон президенти ташриф дастурига мувофиқ навбатдаги манзилга жўнаб кетди.
Бундан аввал саммитда иштирок этиш учун Қирғизистон, Тожикистон ва Туркманистон президентлари ҳам келган эди. Уларни ҳам аэропортда бош вазир кутиб олди.
“Марказий Осиё—Европа иттифоқи” биринчи саммити
Ушбу саммит Самарқанд шаҳрида 3—4 апрель кунлари бўлиб ўтади. Шавкат Мирзиёев раислигида ўтадиган саммит ишида Европа кенгаши президенти Антониу Кошта, Европа комиссияси президенти Урсула фон дер Ляйен, Қозоғистон республикаси президенти Қосим-Жўмарт Тўқаев, Қирғиз Республикаси президенти Садир Жапаров, Тожикистон президенти Эмомали Раҳмон ва Туркманистон президенти Сердар Бердимуҳамедов иштирок этади.
“Марказий Осиё—Европа иттифоқи” биринчи саммитининг ишбилармонлик дастури Шавкат Мирзиёев ва Европа тикланиш ва тараққиёт банки президенти Одил Рено-Бассо билан учрашувидан бошланди. 3 апрель куни саммитда иштирок этадиган яна бир қатор делегациялар раҳбарлари билан қатор икки томонлама музокаралар ўтказилиши режалаштирилган. 4 апрель куни Марказий Осиё давлатлари ва Европа иттифоқининг асосий институтлари раҳбарлари иштирокида кўп томонлама тадбирлар бўлиб ўтади.
Изоҳ (0)