Эрон президенти Иброҳим Раисий 9 ноябрь куни рафиқаси Жамиле Аламолхода ҳамроҳлигида Тошкентга келди.
У Иқтисодий ҳамкорлик ташкилотининг XVI саммитида иштирок этиш учун Ўзбекистонга ташриф буюрди.
Тошкент халқаро аэропортида уни бош вазир Абдулла Арипов ва бошқа расмийлар кутиб олди. Шундан сўнг, олий мартабали меҳмон ўзи учун ажратилган қароргоҳга жўнаб кетди.
Шавкат Мирзиёев раислигида ўтадиган ИҲТ саммитида иштирок этиш учун бунга қадар Қозоғистон бош вазири Алихан Смаилов, Покистон бош вазири Анвар ул-Ҳақ Какар, Қирғизистон президенти Садир Жапаров, Туркия президенти Ражаб Тоййиб Эрдоғон, Озарбайжон президенти Илҳом Алиев пойтахтга етиб келгани хабар қилинган эди.
Кун тартибига мувофиқ, ИҲТ доирасида савдо-иқтисодий, инвестисиявий, транспорт-коммуникациявий ва гуманитар ҳамкорликни янада кенгайтириш ҳамда ушбу кўп томонлама тузилма фаолиятини такомиллаштириш масалалари кўриб чиқилади.
Изоҳ (0)