Покистон бош вазири Шаҳбоз Шариф Ўзбекистонда камбағаллик даражаси тушиб, савдо кўрсаткичи ошганини мўжиза деб атади. Бу фикрни 26 февраль куни Ўзбекистон—Покистон саммити якунида оммавий ахборот воситалари вакиллари билан учрашувда айтиб ўтди. Унда Шавкат Мирзиёев ва Покистон бош вазири бўлиб ўтган музокаралар якунларига изоҳ берди.
“Сиз давлат бошқарувига келган илк кунлардан бошлаб Ўзбекистонни қайтадан трансформация қилдингиз. Сиз жамиятни қайта тикладингиз. Агар адашмаётган бўлсам, 2016 йилда Ўзбекистонда камбағаллик даражаси 42 фоиз бўлган, савдо кўрсаткичи ҳам паст эди. Бугун камбағаллик даражаси 8 фоизга тушди, инвестициялар ҳажми эса 30 миллиардга етди. Шунинг ўзи катта мўжиза эмасми?! Бу ростдан ҳам мўжиза”, деди Шаҳбоз Шариф.
Унинг таъкидлашича, бундай натижаларга баландпарвоз гаплар орқали эришилмайди ёки яхши бир кенгашни ташкил этиш билан ҳал бўлиб қолмайди. Мўжизалар аниқ қарашлар, юқори динамика, тинимсиз меҳнат ва якдил мақсад сари дадил интилиш орқали пайдо бўлади.
“Мен мана шундай улуғ сифатларни сизда кўрдим”, деди Покистон бош вазири Шавкат Мирзиёевга қарата.
Ўзбекистон президенти учрашувлар самарали бўлганини алоҳида қайд этиб, ушбу тарихий ташриф Ўзбекистон—Покистон стратегик шериклигида янги саҳифа очишини таъкидлади. Сўнгги йилларда икки томонлама ҳамкорлик жадал ривожланиб бораётганини юксак баҳолади.
Покистон бош вазирининг Ўзбекистонга расмий ташрифи
Покистон бош вазири Шаҳбоз Шариф Шавкат Мирзиёевнинг таклифига биноан 25 февраль куни расмий ташриф билан Ўзбекистонга келганди. Уни Тошкент халқаро аэропортида бош вазир Абдулла Арипов ва бошқа расмийлар кутиб олди. Қисқа суҳбатдан сўнг Шаҳбоз Шариф Абдулла Арипов ҳамроҳлигида “Янги Ўзбекистон” боғига борди ва Мустақиллик монументи пойига гул қўйди. 26 февраль куни Тошкент шаҳридаги Халқаро конгресс марказида Покистон бош вазири расмий кутиб олишга бағишланган тантанали маросим бўлиб ўтди. Сўнг Шавкат Мирзиёев ва Покистон бош вазири тор доирада ва расмий делегациялар иштирокида музокаралар ўтказди. Музокалар якунида Ўзбекистон ва Покистон ўртасида икки томонлама битимларнинг салмоқли тўплами имзоланди.
Ташриф давомида Шавкат Мирзиёев ва Шаҳбоз Шариф Ўзбекистон—Покистон бизнес форумида иштирок этди. Тадбирда икки мамлакат етакчи компанияларининг 300 нафарга яқин раҳбарлари ва вакиллари иштирок этди. Покистон томонидан Al-Rafique Enterprises, Mehran Dates Products, Brighto Chemicals, Transfopower Industries, FWO, T.M.C, Pakistan Mobile, TCS ва бошқа кўплаб компаниялар қатнашди.
Ушбу тадбирлардан сўнг Покистон бош вазири Шаҳбоз Шарифнинг Ўзбекистонга ташрифи ниҳоясига етди. Уни Тошкент халқаро аэропортида бош вазир Абдулла Арипов ва бошқа расмийлар кузатиб қўйди.
Изоҳ (0)