Ўзбекистонда 13 та музейни таъмирлаш учун 8,85 млрд сўм ажратилган — Маданий мерос агентлиги

Ўзбекистонда 8 209 моддий маданий мерос объекти давлат муҳофазасига олинган. Бу ҳақда Маданий мерос агентлиги маълум қилди.

Қайд этилишича, шундан 4 748 таси археология, 2 252 таси архитектура объекти, 678 таси монументал санъат асари, 532 таси диққатга сазовор жойлар ҳисобланади. Ўзбекистон мусулмонлари идораси ҳузуридаги Вақф хайрия жамоат фондига 189 объект текин фойдаланиш учун берилган.

Вазирлар Маҳкамасининг 2023 йил 31 майдаги баёни билан 2023 йилда 158 маданий мерос объектида илмий-техник тадқиқотлар ўтказиш, лойиҳа-смета ҳужжатларини ишлаб чиқиш ҳамда асрашга доир ишларни амалга ошириш белгиланган. Бу мақсад учун бюджет маблағлари ҳисобидан 150 миллиард сўм ажратилган.

2023 йилда 104 маданий мерос объектидан 59 тасининг лойиҳа ҳужжати ишлаб чиқилган ва илмий эксперт кенгашига киритилган. Шундан 47 объектнинг лойиҳа ҳужжати маъқулланган, 27 объектнинг лойиҳа-смета ҳужжати шаҳарсозлик экспертизаси хулосаси олиш учун киритилган.

Айни пайтда таъмирлаш тиклаш ишларини амалга ошириш мақсадида 400 нафардан ортиқ маҳаллий уста-реставраторлар фаолият юритмоқда. Эрон ва Туркия давлатларидан 40 нафарга яқин реставраторларни жалб этиш ва улар билан тажриба алмашиш режалаштирилган.

2023 йилда давлат музейларини мукаммал таъмирлаш учун ажратилган маблағлар ҳисобидан 13 давлат музейида таъмирлаш ишлари бошланган. Бунинг учун эса бюджетдан 8,85 миллиард сўм ажратилган.

Бундан олдин, Маданий мерос агентлиги ижтимоий тармоқларда Худоёрхон ўрдасининг бир қисми ижарага берилаётгани айтилган хабарларга муносабат билдирганди. Шунингдек, Сурхондарёда археологик ёдгорликлар тупроғидан молхона, ҳожатхона қурилгани аниқланган эди.