Тошкентдаги “Шарқ” нашриёти бинолари Моддий маданий мерос объектлари рўйхатидан чиқарилди. “Газета.уз”нинг хабар қилишича, “Lex.uz”даги Миллий рўйхатга киритилган ўзгартиришлар шундан далолат бермоқда.
Ўзбекистонда моддий маданий мероснинг кўчмас мулк объектлари миллий рўйхати Вазирлар Маҳкамасининг 2019 йил 4 октябрдаги қарори билан шакллантирилган. Қарор иловасининг аввалги таҳририда Тошкент шаҳридаги моддий маданий мерос объектлари рўйхатида 87-рақам остида 1927 йилда қурилган “Илгариги ‘Правда Востока’ газетаси босмахонаси биноси”, 88-рақам остида эса ХХ аср давомида шаклланган “Шарқ” нашриёти матбаа корхонаси бинолари кўрсатиб ўтилган эди.
Қарор иловасига Вазирлар Маҳкамасининг 2024 йил 15 январдаги янги қарори асосида ўзгартириш киритилган бўлиб, Тошкент шаҳридаги моддий маданий мерос объектлари рўйхатида 87 ва 88-объектлар йўқ, рўйхатда 86-объектдан кейин 89-объект келади.
Вазирлар Маҳкамасининг 2024 йил 15 январдаги 28-сонли қарори очиқ эълон қилинмаган, “Lex.uz” базасида ҳам унга жонли ҳавола берилмаган.
Давлат активларини бошқариш агентлиги 2023йил 20 сентябрида “Шарқ” нашриёт-матбаа корхонаси бинолари ва ЎзА биносини сотувга қўйганди. Бу жамоатчиликнинг кескин норозилигини келтириб чиқарганди. Маданий мерос агентлиги ҳар иккала бино Ўзбекистон моддий маданий мероснинг кўчмас мулк объектлари миллий рўйхатига киритилганини эслатиб, уларни аукциондан олиб ташлаш бўйича огоҳлантириш берганди.
Агентлик ўз баёнотида “Маданий мерос объектларини муҳофаза қилиш ва улардан фойдаланиш тўғрисида”ги қонуннинг 23-моддасига мувофиқ, давлат мулкида турган моддий маданий мерос объектлари давлат тасарруфидан чиқарилиши ва хусусийлаштирилиши мумкин эмаслигини ҳам билдирганди.
Изоҳ (0)