Ўзбекистон Давлат активларини бошқариш агентлиги Маданий мерос агентлигининг “Шарқ” нашриёт-матбаа ижодий уйи бинолари, жумладан, ҳозирда ЎзА эгаллаб турган 16 қаватли бинони аукциондан олиб ташлашни талаб қилган баёнотига изоҳ берди.

Тошкент шаҳри Миробод тумани, Буюк Турон кўчаси, 41-уй манзилида жойлашган бинолар Вазирлар Маҳкамасининг 2019 йил 4-октябрдаги 846-сонли қарори билан Моддий маданий мерос кўчмас мулк объектларининг давлат реестрига киритилган.

2023 йил июндаги кадастр ҳужжатларига кўра объектнинг умумий ҳудуди 28 888 квадрат метрни, бўш ер майдони 15 211 квадрат метрни, бино ва иншоотларнинг ҳажми 42 048 квадрат метрни, шундан 25 024 квадрат метрни ишлаб чиқариш ва ёрдамчи бинолар ташкил этади ва учта алоҳида маъмурий бинолар мавжуд.

Давактив агентлиги ва Маданий мерос агентлиги раҳбарлари ўртасида ўтказилган мулоқотда объект ҳудудида жойлашган бино-иншоот ёки ер майдонининг қайси қисми (бири) маданий мерос объекти ҳисобланишига аниқлик киритиш бўйича биргаликда иш ташкил этиш келишиб олинган ва бу тўғрисида Давактив агентлигининг мурожаати юборилган.

Қайд этилишича, “Шарқ” нашриёти бугунги кунда кам қувватда ишламоқда (50 фоиз), бизнес-режа кўрсаткичлари бажарилмай келмоқда, 2023 йил ярим йиллик якуни бўйича соф тушуми ўтган йилга нисбатан пасайган, соф фойдаси эса атиги 13,8 миллион сўмни ташкил этиб, 80 фоизга камайган.

Жамиятнинг мавжуд бино-иншоотлари ва ҳудудидан самарали фойдаланилмасада, катта миқдорда мол-мулк ва ер солиғи тўлаб келмоқда. Жумладан, 2022 йил ва 2023 йилнинг ўтган даврида жамият томонидан 3,3 миллиард сўм миқдорида мол-мулк ва ер солиғи тўланган.

“Буюк Турон кўчаси, 41-уйда жойлашган “Шарқ” нашриёт-матбаа АЖнинг бино-иншоотлари ва ишлаб чиқариш ускуналари эса маънан эскирган ва таъмирталаб, аксарияти эса яроқсиз аҳволга келиб қолган, шунинг учун ҳам уни ихчам ва замонавий бинога кўчирилиши жамият билан келишилган ҳолда амалга оширилмоқда”, — дейилади хабарда.

Шу билан бирга, Буюк Турон кўчаси, 42-уйда жойлашган Ўзбекистон миллий ахборот агентлиги (УзА)нинг маъмурий биноси маданий мерос объекти рўйхатига киритилмаган, аммо ушбу бино Тошкент шаҳрининг тарихий архитектурасини, шу жумладан, муҳим “модернизм” ёдгорлиги қиёфасини акс эттиришини инобатга олиб, уни сақлаб қолиш мақсадида савдонинг асосий шарти этиб маъмурий бинонинг тарихий қиёфасини сақлаб қолиш белгиланган.

“Давактив агентлиги томонидан Маданий мерос агентлиги билан яқиндан ҳамкорлик ўрнатган ҳолда маданий мерос объектига аниқлик киритилади ва мулкий мажмуани амалдаги қонунчиликка қатъий амал қилган ҳолда шаффоф хусусийлаштириш жараёнини таъминлайди, жараённинг ҳар бир босқичи тўғрисида оммани хабардор қилиб боради”, — дейилади хабарда.

Аввалроқ Ўзбекистондаги йирик корхоналар ва банкларнинг давлат акция пакетлари Иқтисодиёт ва молия вазирлигига ўтказилгани тўғрисида хабар берилганди.