Бош прокуратура Ўзбекистонда ноқонуний дарахт кесиш ҳолатлари ортидан қанча зарар ундирилганини маълум қилди.
Хабарга кўра, дарахтлар кесилишига эълон қилинган мораторий ижросини ўрганиш бўйича ташкил этилган назорат тадбирлари давомида 4 190 та ноқонуний дарахт кесиш ҳолати аниқланиб, ҳар бир нобуд қилинган дарахт учун 100 туп кўчатни компенсация тарзида экиш мажбурияти юкланиши ва давлат ихтиёрига 8,7 миллиард сўм ундирилиши таъминланди.
Шунингдек, ижарадаги 67 778 гектар ўрмон фонди ер майдонлари хатловдан ўтказилиб, 17 та ноқонуний қарор бекор қилинди ҳамда ноқонуний эгалланган 1 577 гектар ер майдони ўрмон фонди ҳисобига қайтарилди, жиддий қонун бузилиши ҳолатлари юзасидан 24 та жиноят иши қўзғатилди.
Назорат тадбирларида 65,7 миллиард сўмлик 215 минг метр куб норуда фойдали қазилмалар ноқонуний қазилгани ҳолатлари юзасидан 45 та жиноят иши қўзғатилиб, табиатга етказилган 7,1 миллиард сўм зарар ва 34,8 миллиард сўм компенсация тўловлари ундирилди.
Тадбирлар давомида дарёларнинг муҳофаза зоналарида 744 та ноқонуний чиқинди ташлаш жойлари бартараф этилиб, сув ҳавзаси минтақалари 17 200 тонна чиқиндидан тозаланди.
Ҳозирда қайд этилган дарёлар ўзанларида қонунбузилишларнинг олдини олиш мақсадида видеокузатув камералари ўрнатиш ишлари амалга оширилиб, онлайн назорат жорий қилинмоқда.
Изоҳ (0)