Тошкент шаҳар экология бошқармаси бошлиғи Фарҳод Деҳқоновнинг фаолиятига хизмат текшируви тайинланди ва у 2023 йилнинг 30 декабридан 2024 йилнинг 1 февралига қадар ишдан четлаштирилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги ахборот хизмати маълум қилди.
Ижтимоий тармоқларда Тошкент шаҳри Юнусобод туманида бир дона эман дарахтига қурувчилар томонидан шикаст етказилаётгани ҳақида хабарлар тарқалганди.
Тошкент шаҳар экология бошқармаси томонидан ўрганиш ишлари олиб борилганида “Мах Prosessing” МЧЖ мансабдор шахслари томонидан 1 дона эман дарахти тегишли агротехник талабларга амал қилинмасдан Тошкент вилояти Ўртачирчиқ туманига кўчириб ўтқазилгани аниқланди. Айни дамда мазкур ҳолат юзасидан Тошкент шаҳар прокуратураси томонидан “Мах Prosessing” МЧЖ мансабдор шахслари ва бошқаларга нисбатан Жиноят Кодексининг 198-моддаси 3-қисми (экинзорларни, ўрмон, дарахтларни ёки бошқа ўсимликларни қасддан шикастлантириш, пайҳон қилиш, нобуд қилиш кўп миқдорда зарар етказилиш) ва 229-моддаси (ўзбошимчалик) билан жиноят иши қўзғатилган.
Экология, атроф-муҳитни муҳофаза қилиш ва иқлим ўзгариши вазирининг тегишли буйруғига асосан, Меҳнат кодексининг 151, 153-моддаларига кўра Тошкент шаҳар экология бошқармаси бошлиғининг фаолиятига хизмат текшируви тайинланди ва Фарҳод Деҳқонов 2023 йилнинг 30 декабридан 2024 йилнинг 1 февралига қадар ишдан четлаштирилди.
Вазирнинг буйруғига асосан, хизмат текшируви давомида Тошкент шаҳар экология бошқармасининг барча таркибий бўлинмалари раҳбарлари, ходимларининг фаолияти ҳамда 2021–2023 йиллар давомида бошқарма томонидан давлат ўрмон фондига кирмайдиган ерларда дарахтлар ва буталарни кесишга берилган рухсатномаларнинг қонунийлиги ва асослари ўрганилади.
Таъкидлаш жоизки, пойтахтда мораторий талабларига тўлиқ риоя этилмаётганлиги, аҳоли томонидан дарахтларнинг кесилиши борасида кўплаб эътирозлар билдирилаётганлиги, қонунчиликка амал қилинмасдан дарахтларни кесишга ёки кўчиришга қайта-қайта рухсатнома берилаётганлиги сабабли Экология вазирлиги шу йилнинг 1 февралига қадар Тошкент шаҳар экология бошқармаси ваколатларини чеклашига тўғри келди, — дейилади вазирлик ахборотида.
Қўшимча қилинишича, эндиликда дарахтларни кесиш ёки кўчириб ўтқазишга рухсатнома бериш фақатгина вазирликнинг тегишли бошқармаси билан келишилган ҳолда амалга оширилади.
Биринчи ҳибс
Тошкент шаҳри Чилонзор туманида 58 туп дарахт кесилиши ортидан Тошкент шаҳар экология ва атроф-муҳитни муҳофаза қилиш бошқармаси бошлиғи Фарҳод Деҳқонов 9 сентябрь куни ҳибсга олинганди. У Жиноят кодексининг 205-моддаси 2-қисми ‘‘а’’ бандида (ҳокимият ёки мансаб ваколатини суиистеъмол қилиш, давлат ёки жамиятга жуда кўп миқдорда зарар етказиш) назарда тутилган жиноятни содир этганликда гумонланган.
Бу воқеа жамоатчилик орасида норозилик келтириб чиқарди. Дарахтлар кесилишига асосий сабабчилар — ўша ҳудудда қурилиш қилишга рухсат берганлар четда қолиб, экологлар бош айбдор қилингани жамоатчилик вакилларини норози қилганди.
Орадан бир кун ўтганидан сўнг Фарҳод Деҳқонов қўйиб юборилгани ҳақида хабар берилганди. Ҳолат Президент администрациясининг собиқ раҳбари Сардор Умурзоқов назоратига олингани айтилган эди.
Кейинчалик мазкур жиноят ишининг якуни бўйича маълумот берилмаган. Экология, атроф-муҳитни муҳофаза қилиш ва иқлим ўзгариши вазирлиги ахборот хизматининг ‘‘Дарё’’га маълум қилишича, Фарҳод Деҳқонов ўз ишида давом этган.
Изоҳ (0)