Rossiya prezidenti Vladimir Putin “Oreshnik” ballistik raketasi bilan Kiyevga zarba berish uchun nishonlarni aniqlashni buyurdi. Bu haqda manbalarga tayanib, Rossiya ommaviy axborot vositalari xabar berdi.
“Mash” va “Baza” nashrlari manbalariga ko‘ra, Putin Mudofaa vazirligiga shunday ko‘rsatma bergan. Rossiya prezidenti o‘t ochishni to‘xtatish bo‘yicha uch kunlik sulh bo‘lmasligini aytgani ta’kidlanmoqda.
Rossiya pozitsiyasining o‘zgarishi hozirgi provokatsiyalar, jumladan, Ukraina dronlarining poytaxtga hujum qilishga urinishlari hamda Ukrainaning Moskvadagi bayram tadbirlari paytida yanada jiddiyroq provokatsiyalarni tayyorlayotgani bilan bog‘liq, deydi Rossiyaning targ‘ibot manbalari.
Rossiya 21-noyabr kuni o‘zining “Oreshnik” ballistik raketasi bilan Dneprga zarba bergandi, yuqori tezligi tufayli uni tutib olish deyarli imkonsiz. “Oreshnik”ning birinchi parvozidan uch oy o‘tgach, Rossiya 6-fevral kuni ballistik raketa bilan Kiyevni nishonga olishni rejalashtirgan. Harbiy muxbir Kirill Sazonov ta’kidlashicha, “Oreshnik” nishonga yetib bormasdan, ishdan chiqib, portlagan.
Rossiya prezidenti Vladimir Putin “Oreshnik”ning ilk parvozlaridan so‘ng Kiyevdagi “qaror qabul qilish markazlari”, jumladan, Zelenskiy ofisini nishonga olish bilan tahdid qilgandi. Ammo ikkinchi parvozning muvaffaqiyatsizligi Rossiya uchun og‘ir zarba bo‘ldi.
Xabarlarga ko‘ra, “Oreshnik”ning muvaffaqiyatsizlikka uchragan ikkinchi parvozi nafaqat kiyevliklar va Ukraina rahbarlarini boshpanalardagi tahlikali kutishdan xalos etdi, balki Kreml uchun ham teskari ta’sir ko‘rsatdi. Chunki yadro kallaklari bilan jihozlangan qit’alararo ballistik raketaga o‘xshash “Oreshnik” raketasi harbiy ta’sirdan ko‘ra ko‘proq vahima uyg‘otgandi.
Izoh (0)