O‘zbekistonda 113 ta yangi yo‘nalish, shu jumladan 56 ta avtobus yo‘nalishi ochilgani ma’lum qilindi. Bu haqda Transport vazirligi xabar berdi.
Qayd etilishicha, yo‘lovchilarga ko‘rsatilayotgan xizmatlar sifatini yaxshilash uchun birinchi navbatda harakat tarkibi zamonaviy avtobus va elektrobuslar bilan yangilanmoqda. Maqsad sayohatlarni yanada qulayroq qilish orqali jamoat transportidan kundalik foydalanuvchilar sonini oshirishdir.
Shu maqsadda 2024-yilning o‘zida hududlarda tadbirkorlar 700 ta avtobus va 530 dan ortiq mikroavtobus sotib oldi. 2025-yilning yanvar-aprel oylarida esa hududlarga yana 241 ta avtobus va 133 ta mikroavtobus olib kelindi.
113 ta yangi yo‘nalish, shu jumladan 56 ta avtobus yo‘nalishi ochildi, bu hududlardagi transport aloqasini yaxshiladi.
Viloyat transport boshqarmalarida markazlashtirilgan dispetcherlik xizmati joriy etildi. 48 ta yo‘nalish brutto-shartnomalar asosida xizmat ko‘rsatishga o‘tdi – bu sifat va xavfsizlikka ustuvorlik berilgan yangi modeldir.
Angrenga 15 ta Yutong avtobusi olib kelingandi. Zoir Mirzayev 2024-yil oktyabrida o‘tkazgan hokimlik soatida Toshkent viloyatida transport sohasidagi xizmatlarni yaxshilash uchun 1000 ta yangi avtobus xarid qilish bo‘yicha topshiriq bergandi.
Transport vazirligi matbuot xizmatining bildirishicha, hududlarda aholiga ko‘rsatilayotgan transport xizmatlari sifatini yaxshilash maqsadida zamonaviy avtobuslarni olib kelish ishlari davom etmoqda. Toshkent shahriga yana 1000 ta Yutong avtobusini olib kelish imkoniyatlari o‘rganilmoqda. Andijon viloyatiga Xitoydan 100 ta elektrobus xarid qilinishi rejalashtirilgan.
Izoh (0)