O‘zbekiston xalq artisti Yulduz Usmonova Instagram’dagi sahifasida jonli efirga chiqib, komik aktrisa Halima Ibragimovaning o‘limi sababi haqida gapirdi.
Grijasi (umurtqa pog‘onasi churrasi) bor edi. Yo grijasini oldirish kerak edi, yoki tana vaznini yengillashtirish kerak edi. Shuning uchun oshqozonini kestirish amaliyotini qildiribdi, menga ham bildirmay. Yo‘q bo‘lib qoldi. Xavotirlanib qo‘ng‘iroq qildim. “Opa, operatsiya qildirgandim, joyi yiringlab ketibdi”, dedi. Operatsiya boshqatdan qilinganida teri yetmay qoldi, 20 ga 50 joyi ochiq turgan, o‘sha joy yiringlagan. U ham, bu ham emas, umri shu joygacha ekan. Biz shunday bo‘lishini bir hafta oldin bilgandik, tayyor bo‘lib turgandik. Bugun o‘sha joyi tikilishi kerak edi. Kamiga qondagi qand miqdori ham 30 ga ko‘tarilib ketibdi. Qon bosimi ham juda baland edi. Ustiga-ustak donor ham topilmagan, deydi Yulduz Usmonova.
Shuningdek, Halima Ibragimova Yulduz Usmonovadan umra safariga olib borishni so‘ragani, oxirgi paytda besh vaqt namoz o‘qigani haqida ham gapirib o‘tdi.
Yoshligidan shafqatsiz olamda voyaga yetdi u. Ota-onasidan erta yetim qolgan edi. Chumchuq qush, shikasta qalb sohibasi, ta’sirchan, tezda yig‘lab yuboradigan qiz edi. Namozga egilib qolgandi. Umralarni niyat qilgandi. Birinchi operatsiya qilinganida ham bir komaga tushib qaytib chiqqandi. O‘shanda reanimatsiyada yotgandi. “Reanimatsiyada uch kishi yotdik. O‘shanda yotganimda bitta katta odam keldi, u meni olib ketgani keldi, deb o‘yladim. Ertalab yonimda yotgan ayol vafot etganini eshitdim”, deb yig‘lab aytib bergandi. Xullas, o‘limi yaqinligini ko‘ngli sezgan, ayon bergan. Ertadan keyin safarga ketaman, unga ham umra badal qilaman, deydi Yulduz Usmonova.
Izoh (0)