Франция пойтахти Париж шаҳрида “Замонлар оша нигоҳ: Худойберган Девонов мероси” кўргазмаси ўтказилмоқда.
Ўзбекистон президенти ёрдамчиси Саида Мирзиёева ҳамиша жаҳон ҳамжамиятига Ўзбекистонни ўзига хос ракурсларда кўрсатишга, мамлакатнинг кутилмаган қирраларини намойиш этишга ҳаракат қилинишини маълум қилди.
“Ҳар бир тадбир одамларда чинакам қизиқиш уйғотади — улар Ўзбекистонни ўзлари учун янгитдан кашф этишади. Мана, бугун Парижни “Замонлар оша нигоҳ: Худойберган Девонов мероси” кўргазмасига таклиф қилмоқдамиз”, деб ёзади президент ёрдамчиси.
Таъкидланишича, кўргазма Марказий Осиёдаги биринчи профессионал фотограф ва кинотасвирчи, Ўзбекистондаги илк фото ва видео лаборатория асосчиси томонидан олинган 34 та ноёб кадрдан иборат.
“Бу маданий ўзлигимизни ифода этувчи ташаббуслардан бири, қадриятларимиз ва анъаналаримизни англаш учун бебаҳо тарихий манба.
Парижликлар улкан архивнинг бир қисми бўлган ушбу фотоколлекциядаги кўплаб суратларнинг илк томошабинига айланишади. Мазкур ноёб суратлар илгари на мамлакатимизда, на хорижда намойиш этилган. Уларда ўтмишнинг бетакрор лаҳзалари — Хоразмнинг кундалик ҳаёти, урф-одатлари, меъморчилиги ва одамлар турмуши акс этган.
Экспозиция тарихимизнинг ноёб саҳифаларини очиб беради, маданий меросимиз нақадар ранг-баранг ва бой эканини намоён этади”, деб ёзган президент ёрдамчиси Саида Мирзиёева.
Изоҳ (0)