Президент ёрдамчиси Саида Мирзиёева Хитойда ХIX Осиё ўйинларига бағишланган “Ранг-баранг Осиё: Осиё либослари кўргазмаси”да иштирок этди.
“Халқаро тадбирнинг дунёга машҳур Ипак музейида ўтказилаётгани биз учун, айниқса, қадрли. Чунки, ҳунармандчиликнинг ушбу йўналиши мамлакатларимизни камида уч минг йиллик тарихи билан бирлаштириб туради.
Ипак билан савдо қилинган даврларда бизни қалин дипломатик муносабатлар, маданият ва технологиялар алмашинуви янада яқинлаштирди. Бу эса Буюк Ипак йўли бўйлаб ўзаро тараққиёт ва иқтисодий фаровонликка хизмат қилган. Анъаналаримиз ва асосий қадриятларимиз ўхшашлиги ҳам балки шундандир.
Хитойлик дўстларимизга самимий меҳмондўстлиги ва ўзбек маданиятига бўлган қизиқишлари учун миннатдорлик билдирмоқчиман. Ипакчилигимиз тарихи — умумий маданий меросимизнинг ажралмас қисми бўлиб, мазкур кўргазма буни намойиш этиш учун ажойиб имкониятдир”, — деб ёзади Саида Мирзиёева.
Самарқанд музей-қўриқхонаси ва Ўзбекистон Давлат санъат музейи сара тўпламларига мансуб 20 та музей экспонатини тақдим этилаётган кўргазма 12 ноябрга қадар давом этади. Кўргазмага Ўзбекистон музейлари сара тўпламларидан анъанавий ўзбек сўзаналари, чопон ва заргарлик буюмлари жўнатилган. Ташриф буюрувчилар ўзбекистонлик усталар томонидан тайёрланган анъанавий санъатнинг энг яхши намуналарини томоша қилишлари мумкин.
Маданият ва санъатни ривожлантириш жамғармасининг маълум қилишича, 26 сентябрь куни Ханчжоу шаҳрида Ўзбекистоннинг бой маданий ва тарихий меросига бағишланган “Ўзбекистон оқшоми” байрами бўлиб ўтган.
Оқшом тадбири доирасида анъанавий ўзбек газламаларини ишлаб чиқариш жараёни намойиш этилиб, дастурнинг мусиқий қисмидан эса машҳур “Баҳор” давлат ансамбли, “Мақом” ансамбли ва халқ артисти Абдуҳошим Исмоиловларнинг куй ва хонишлари ўрин олган.
Изоҳ (0)