“Лазги. Муҳаббат ва қалб рақси” балет спектакли Қозоғистонда ҳам намойиш этилди

“Лазги. Муҳаббат ва қалб рақси” балет спектакли Қозоғистонда ҳам намойиш этилди. Бу ҳақда президент ёрдамчиси Саида Мирзиёева хабар берди. 

Унга кўра, 17 март куни Абай номидаги Қозоғистон миллий опера ва балет театри саҳнасида қадимий рақс — лазги жонланган. Бундай тадбирлар гўзал ўзбек санъатини намоён этибгина қолмай, қардош миллатлар ўртасидаги дўстлик, биродарлик ришталарини янада мустаҳкамлашга, ўзаро муносабатларни янги босқичга кўтаришга ёрдам бериши таъкидланган.

Қозоғистонга қилган аввалги сафаримиз чоғида “Лазги. Муҳаббат ва қалб рақси” балети шу қардош юртда ҳам намойиш этилса, деб ният қилгандик. Эзгу ниятимиз  ижобат бўлди — 17 март куни Абай номидаги Қозоғистон миллий опера ва балет театри саҳнасида қадимий рақсимиз — лазги жонланди.
⠀
Бундай маданий тадбирлар гўзал санъатимизни намоён этибгина қолмай, қардош миллатлар ўртасидаги дўстлик, биродарлик ришталарини янада мустаҳкамлашга, ўзаро муносабатларни янги босқичга кўтаришга ёрдам беради.
⠀
Биз, президентимиз томонидан бошлаб берилган яхши қўшничилик анъаналарига содиқ қолган ҳолда, Марказий Осиё давлатлари билан иқтисодий, сиёсий ва, албатта, маданий соҳаларда ҳамкорликни кучайтиришга ўз ҳиссамизни қўшишни мақсад қилганмиз. Халқларимиз ўртасида тотувлик, аҳиллик ҳукм сурса, ушбу минтақа қудратли ҳамжиҳатлик марказига айланиши шубҳасиз, дейди Саида Мирзиёева.

Маълумот учун, 2021 йилда Саида Мирзиёева бошчилигидаги Маданият ва санъатни ривожлантириш жамғармаси томонидан Жаҳон мероси рўйхатига киритилган лазги рақси балет кўринишида саҳналаштирилганди. 2022 йил 28–29 июнь кунлари “Лазги” балети Бурса шаҳридаги Меринос Отатурк саҳнасида намойиш этилган.

2023 йил сентябрида Россия Катта театрида ушбу балет премераси бўлиб ўтган. 2024 йилнинг январида Пекиндаги Хитой миллий опера театри саҳнасида “Лазги. Муҳаббат ва қалб рақси” балет спектакли намойиш этилди. Уч йиллик гастрол сафарлари давомида “Лазги. Муҳаббат ва қалб рақси” спектакли Дубай, Истанбул, Бурса, Дортмунд, Москва, Париж ва Санкт-Петербургда томошабинлар олқишига сазовор бўлган.

“Лазги” Хоразм рақси Ўзбекистон маданий меросининг элементи сифатида Инсониятнинг номоддий маданий мероси репрезентатив рўйхатига киритилган. Бу ҳақдаги қарор 2019 йил 12 декабрь куни ЮНЕСКО нинг Номоддий маданий меросни муҳофаза қилиш бўйича ҳукуматлараро қўмитасининг 14-сессиясида қабул қилинган.

2024 йили Бокуда очилган кўргазма доирасида Ўзбекистоннинг маданий мероси билан танишув “Лазги — Муҳаббат ва қалб рақси” спектаклидан бошланган эди.