Саида Мирзиёева Британия музейида “Ипак йўллари” кўргазмасининг тантанали очилиш маросимида қатнашди

Лондондаги Британия музейида 26 сентябрь куни Silk Roads (“Ипак йўллари”) кўргазмасининг тантанали очилиш маросими бўлди. Унда Президент ёрдамчиси Саида Мирзиёева қатнашди.

“Ишончим комилки, ушбу лойиҳа Ипак йўли тарихи ва маданиятига қизиқувчиларга илҳом бағишлайди, халқлар ўртасидаги маданий алоқаларни мустаҳкамлаш, ривожлантириш йўлидаги умумий саъй-ҳаракатларимизни ифода этади”, деди у ва кўргазма тантанали очилиш маросимида қатнашиш унга катта шараф эканини айтди.

Кўргазмада Ўзбекистон музейларидан тўпланган, бой тарихий ва маданий меросимизни акс эттирувчи нодир, қимматли осори атиқалар — 14 та экспонат намойиш қилинади.

Музейда намойиш этиладиган экспонатлар V-Х асрлар оралиғида Ипак йўли бўйлаб ҳаракатланган инсонлар, маҳсулот ва ғоялар маданий ҳамда тарихий алоқаларнинг ривожланишига қандай хизмат қилганини кўрсатади.

Кўргазма 2024 йил 26 сентябрдан 2025 йил 23 февралга қадар ташриф буюрувчилар учун очиқ бўлади.