Ўзбекистон президенти ёрдамчиси Саида Мирзиёева ўзининг Telegram’даги канали орқали 4 сентябрь куни UNESCO’нинг Париждаги Бош қароргоҳида “Абу Райҳон Беруний. Географик ва интеллектуал саёҳатлар” кўргазмаси очилганини маълум қилди.
Қайд этилишича, мазкур лойиҳа буюк аллома ва мутафаккир таваллудининг 1050 йиллигига бағишланган.
Ташриф буюрувчилар визуал инсталляциялар ёрдамида Абу Райҳон Берунийнинг ҳаёти ва ижоди, кашфиёт ва изланишлари ҳақида маълумот олишлари мумкин. Экспозицияда алломанинг Франция миллий кутубхонаси фондидан йиғилган қўлёзмаларига алоҳида жой ажратилган.
“Ўйлайманки, ушбу лойиҳа Европа жамоатчилигида катта қизиқиш уйғотиб, буюк алломаларимиз мероси билан фахрланадиган ўзбек замини ҳақидаги тасаввурларини янада бойитади.
Шу ўринда Ўзбекистон UNESCO Бош конференциясининг 43-сессиясини 2025 йилда Самарқандда ўтказишга тайёрлигини мамнуният билан маълум қиламан! Агар ушбу таклиф маъқулланса, бу тарихий воқеа UNESCO сессияларини фақат Парижда чақириш бўйича 40 йилдан ошиқ давом этган анъанани ўзгартира олади”, — деб ёзади Саида Мирзиёева.
Август охирларида “Абу Райҳон Беруний номидаги UNESCО — Ўзбекистон халқаро мукофотини таъсис этишни қўллаб-қувватлаш тўғрисида” президент қарори эълон қилинганди. Қарорга мувофиқ, UNESCО билан ҳамкорликда Абу Райҳон Беруний номидаги UNESCО – Ўзбекистон халқаро мукофотини таъсис этиш ҳамда Париж шаҳридаги UNESCО бош қароргоҳида 2023 йил 4–8 сентябрь кунлари Абу Райҳон Беруний ҳаёти ва ижодига бағишланган халқаро кўргазма ва тадбирларни юқори савияда ўтказиш белгиланган.
Изоҳ (0)