Июль ойи ўрталарида Фаластинда 1 миллиондан ортиқ одам ўлимга олиб келиши мумкин бўлган қаттиқ очарчиликка дуч келади.
Бундай прогноз БМТнинг Озиқ-овқат ва қишлоқ хўжалиги ташкилоти (FAO) ва ташкилотнинг Жаҳон озиқ-овқат дастури (WFP) қўшма ҳисоботида келтирилган.
Мали, Судан ва Жанубий Судан ҳам очарчиликка мойил давлатлар қаторига киради. FAO ва WFP ходимларининг ҳисоб-китобларига кўра, 2024 йилнинг октябригача бўлган даврда жами 17 мамлакат ва битта минтақавий кластерда озиқ-овқат хавфсизлиги ёмонлашиши мумкин.
Хусусан, ҳужжат Ливан ва Суриядаги озиқ-овқат хавфсизлиги муаммоларини янада кучайтириши мумкин бўлган инқироз оқибатларидан огоҳлантиради. FAO ва WFP томонидан “очлик нуқталари” дея баҳоланган ҳудудлар орасида Буркина-Фасо, Гаити, Конго Демократик Республикаси, Замбия, Зимбабве, Яман, Малави, Мозамбик, Мьянма, Нигерия, Сомали, Серра-Леоне, Марказий Африка Республикаси, Чад ва Эфиопия ҳам бор.
Ҳисоботда айтилишича, Яқин Шарқ ва Шимолий Африкадаги геосиёсий кескинликлар эҳтимоли 2024 йилда жаҳон иқтисодиёти учун жиддий хавф туғдиради.
“Энергетика ва транспорт нархларининг ошиши, валюта курсининг қадрсизланиши ва озиқ-овқат импортини молиялаштириш билан боғлиқ муаммолар кўплаб заиф мамлакатларнинг ички бозорларига босим ўтказиши ва 2024 йил охиригача озиқ-овқат нархларининг ошишига олиб келиши мумкин”, — дейилади ҳисоботда.
Изоҳ (0)