Афғонистон жанубида “Ал-Қоида” террорчи ташкилотига алоқадор жангарилар тўпланмоқда. Бу ҳақда БМТ Хавфсизлик кенгаши матбуот хизмати баёнотига асосланиб, Atlas Пресс нашри хабар берди.
Манбада айтилишича, БМТ Хавфсизлик кенгашининг санкциялар мониторинги гуруҳи Афғонистон жанубий вилоятлари ҳақида разведка маълумотлари тўплаган. Унга кўра, мамлакатнинг Покистон билан чегараси яқинида 200 дан 400 нафаргача “Ал-Қоида” аъзолари жамланган.
“Толибон” назоратидаги Афғонистонда хорижлик жангарилар борлиги ҳақидаги мониторинг гуруҳи хулосаси Хавфсизлик кенгашига июнь ойи охирида жўнатилган. Кенгаш бу маълумотни бир неча бор қайта текширган.
Хабарда айтилишича, “Ал-Қоида” жангарилари ҳозирда Афғонистонннг Ғазни, Ҳилманд, Қандаҳор, Нимроз, Пактика ва Зобул вилоятларида мавжуд. “Толибон” улар билан алоқаларга эга ва мамлакатда эркин ҳаракатланишга рухсат берган. Жангариларнинг кўпчилиги Афғонистон, Покистон, Бангладеш, Ҳиндистон ва Мьянма фуқаролари ҳисобланади.
“Ал-Қоида”нинг Ҳиндистон яриморолидаги етакчиси Маҳмуд ва унинг ўринбосари Атиф Яҳё Ғорий ҳам Афғонистонда экани хабар берилган. “Толибон” ҳукумати бу маълумотни олдинроқ ошкора рад этган эди.
Ҳисоботда халқаро террорчи гуруҳлар Афғонистонда кенг фаолият олиб бораётганига урғу берилган. Шунингдек, “Толибон” мамлакат назоратини қайта қўлга киритгач, хорижий эктремистик ва террористик отрядлар учун “хавфсиз муҳит” яратиб бергани таъкидланган.
ИШIDнинг Хуросон бўлими раҳбари ҳам Покистондан Афғонистонга кўчган. Бу гуруҳ кичик ҳудудни назорат қилаётган бўлса-да, минтақа бўйлаб мураккаб ҳужумларни амалга ошириши мумкинлигидан огоҳлантирилган.
БМТ Хавфсизлик кенгаши ҳисоботида “Таҳрики Толибон” ва “Шарқий Туркистон ҳаракати” гуруҳлари ҳақида ҳам хавотирли статистика берилади. Бу икки гуруҳ 3000 дан 5000 нафаргача аскарга эга эканлиги, уларга хориждан қурол келаётгани, гуруҳ раҳбарлари Кобулда “Толибон” билан мустаҳкам алоқалар ўрнатгани хабар қилинган.
“Шарқий Туркистон ҳаракати” жангарилари ҳозирда “Толибон” томонидан Бағлон ва Тахор вилоятларига кўчирилган. Гуруҳ олдин Бадахшонда фаолият юритган. Вилоят ҳудудида унинг минг нафардан ортиқ аскари бўлган. Бу гуруҳ Бадахшонга чегарадош Тожикистонда жиддий хавотир уйғотган эди.
Изоҳ (0)