Базел шаҳри менежмент институти пул ювишга қарши кураш бўйича мамлакатларнинг саъй-ҳаракатлари даражасини таҳлил қилувчи Basel Аnti-Money Laundering Index йиллик индексини эълон қилди.
Унга кўра, Ўзбекистон 0 дан 10 гача бўлган шкала бўйича 5,27 балл билан 164 та давлат ичида 81-ўринни эгаллади. Бунда мамлакатда пул ювиш хавфининг энг юқори даражаси 10, энг пасти эса 0 дир.
Ушбу индекс доирасида юрисдикциялар 18 та асосий кўрсаткич бўйича баҳоланади, жумладан, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш, коррупциянинг тарқалишига қарши курашиш соҳасидаги қонун ҳужжатларининг сифати, шаффофлик, сиёсий ва ҳуқуқий хавфлар.
Мазкур рейтингда Қирғизистон 45-ўринда (5,95 балл), Қозоғистон 111-ўринда (4,65 балл), Тожикистон 30-ўринда (6,45 балл), Туркманистон 23-ўринда (6,71 балл) жойлашган.
Шарқий Европа ва Марказий Осиё давлатлари орасида Черногория энг яхши натижа (4,23 балл), Туркманистон эса энг ёмон натижа (6,71 балл) қайд этди.
Беларусь 53-ўринда (5,67 балл), Озарбайжон 74-ўринда (5,40 балл), Украина 82-ўринда (5,26 балл), Грузия 113-ўринда (4,64 балл). Рейтингга Россия киритилмади.
Бу йил жиноий даромадларни легаллаштириш ва терроризмни молиялаштириш хавфи энг паст бўлган 5 та давлат қаторига Сан Марино, Исландия, Финляндия, Эстония ва Андорра кирди.
Энг ёмон кўрсаткичлар Мьянма, Гаити, Конго Демократик Республикаси, Чад ва Венесуэлада.
Изоҳ (0)