Мадриднинг “Реал” клуби 22 ёшли ҳимоячи Рауль Асенсио билан шартномани узайтиришни режалаштирмоқда. Бу ҳақда журналист Фабрицио Романо ўзининг Х (собиқ Twitter) саҳифасида хабар берди.
Манбага кўра, мадридликлар ёш футболчи билан 2025 йилнинг ёзида олти йиллик битим имзолашни мақсад қилган. Клуб ва футболчи ўртасида тузилган олдинги шартномада келишувни 2029 йилгача узайтириш банди бор ва мадридликлар аллақачон уни ишга туширган.
Бироқ “Реал” ҳимоячи билан узоқ муддатли битим имзолашни истамоқда. Шу боис футболчини 2031 йилгача мўлжалланган битим имзолашга кўндирмоқчи. Шунингдек, “қироллик клуби” раҳбарияти унга белгиланган 50 миллион евролик товон пули бандини олиб ташлаган.
Рауль Асенсио “Реал” академияси тарбияланувчиси ҳисобланади. У 2024 йилдан бошлаб асосий жамоа таркибида ўйнай бошлаган. Жорий мавсумда футболчи барча турнирларда 29 та учрашувда майдонга тушиб, 2 та голли узатма амалга оширган. Transfermarkt портали футболчининг қийматини 30 миллион евро этиб белгилаган. Унинг амалдаги шартномаси 2026 йилнинг ёзида якунига етади.
Изоҳ (0)