Madridning “Real” klubi 22 yoshli himoyachi Raul Asensio bilan shartnomani uzaytirishni rejalashtirmoqda. Bu haqda jurnalist Fabrisio Romano o‘zining X (sobiq Twitter) sahifasida xabar berdi.
Manbaga ko‘ra, madridliklar yosh futbolchi bilan 2025-yilning yozida olti yillik bitim imzolashni maqsad qilgan. Klub va futbolchi o‘rtasida tuzilgan oldingi shartnomada kelishuvni 2029-yilgacha uzaytirish bandi bor va madridliklar allaqachon uni ishga tushirgan.
Biroq “Real” himoyachi bilan uzoq muddatli bitim imzolashni istamoqda. Shu bois futbolchini 2031-yilgacha mo‘ljallangan bitim imzolashga ko‘ndirmoqchi. Shuningdek, “qirollik klubi” rahbariyati unga belgilangan 50 million yevrolik tovon puli bandini olib tashlagan.
Raul Asensio “Real” akademiyasi tarbiyalanuvchisi hisoblanadi. U 2024 yildan boshlab asosiy jamoa tarkibida o‘ynay boshlagan. Joriy mavsumda futbolchi barcha turnirlarda 29 ta uchrashuvda maydonga tushib, 2 ta golli uzatma amalga oshirgan. Transfermarkt portali futbolchining qiymatini 30 million yevro etib belgilagan. Uning amaldagi shartnomasi 2026-yilning yozida yakuniga yetadi.
Izoh (0)