Мадриднинг “Реал” клуби Мариано Диас, Эден Азар ва Марко Асенсионинг жамоадан кетишини эълон қилди.
Бельгиялик футболчи ва “қаймоқранглилар” 2024 йилгача амал қиладиган шартномани 2023 йилнинг 30 июнь санасида бекор қилишга келишиб олди. Эден Азар “Реал Мадрид” сафида жами 76 та ўйин ўтказиб, 7 та гол урди ва 12 та голли узатмани амалга оширди.
Азар 2019 йилнинг ёзида 115 миллион евро эвазига “Челси”дан “Реал”га ўтганди. У “Қироллик клуби” билан 8 та совринни қўлга киритди. Футболчи бир мартадан Чемпионлар Лигаси, Клублар ўртасидаги Жаҳон чемпионати, Европа Суперкубогида ва икки мартадан Ла Лига, Испания Кубоги ва мамлакат Суперкубогида ғолиб чиқди.
Ҳужумкор ярим ҳимоячи Марко Асенсио ҳам 2022/23 йилги мавсум якунланганидан кейин “Реал Мадрид”ни тарк этади. Испаниялик футболчининг амалдаги шартномаси июль ойида якунига етади ва у эркин агентга айланади.
Хабарларга кўра, Асенсио фаолиятини “ПСЖ”да давом эттиради.
Асенсио “Реал Мадрид” таркибига 2015 йилда келиб қўшилган. Футболчи “қаймоқранглилар” сафида уч марта Чемпионлар Лигасида, тўрт марта Клублар ўртасидаги Жаҳон чемпионатида, уч марта Европа Суперкубогида, уч марта Ла Лигада, бир марта Испания Кубогида ва уч марта Испания Суперкубогида ғалаба қозонган.
“Реал Мадрид” ҳужумчиси Мариано Диас жамоани тарк этишини эълон қилди. “Қироллик клуби” академиясида шуғулланган доминиканлик футболчи Мадрид жамоаси асосий таркибида олти мавсумни ўтказди.
Диас испан клуби сафида 13 та соврин ютди. У икки марта Чемпионлар Лигаси, уч марта Клублар ўртасидаги Жаҳон чемпионати, икки марта Европа Суперкубоги, уч марта Ла Лига, бир марта Испания Кубоги ва икки марта Испания Суперкубогини боши узра кўтарган.
Изоҳ (0)