Бирлашган Араб Амирликларининг Дубай шаҳрида қийин аҳволга тушиб қолган фуқаро Ўзбекистон бош консулхонаси ходимлари кўмагида бугун ватанга қайтарилди, деб хабар бермоқда “Дунё” АА.
Маълум бўлишича, Ўзбекистоннинг Дубайдаги бош консулхонасига ушбу шаҳардаги “Ал Рашид” шифохонасида даволанаётган М.А. ватанга қайтиш масаласида амалий ёрдам сўраб мурожаат қилган. Ваколатхона ходимлари ушбу мурожаат асосида мазкур шифохонада бўлиб, шифокорлар билан учрашди.
Унда маълум қилинишича, 2023 йил 1 июль куни фуқаро соғлиғидан шикоят қилиб, Dubai Hospital’га мурожаат қилган. Соғлиғи ёмонлашгани туфайли у кейинчалик “Ал Рашид” шифохонасига ўтказилган.
Олиб борилган ўрганишларга кўра, фуқаро 2020 йил 14 январь куни БААга сайёҳлик визаси асосида келгани, айни пайтда мамлакатда ноқонуний тургани, шунингдек, ноқонуний яшаб келаётган муддатда умумий миқдори 90 минг дирҳам (24 800 доллар) қарзи борлиги, мазкур қарзни тўламаган тақдирда БАА ҳудудини тарк эта олмаслиги аниқланган.
Бош консулхона ходимларининг БАА ҳуқуқни муҳофаза қилувчи ва тегишли органлари билан олиб борган музокаралари натижасида М.А.нинг барча қарзларидан воз кечилиб, юзага келган барча муаммолар бартараф этилган.
5 август куни М.А. Ўзбекистон дипломатлари, БААда истиқомат қилаётган фаол ўзбекистонликлар ва “Аёллар ва болаларга ёрдам кўрсатиш маркази” хайрия ташкилоти кўмагида Дубай—Тошкент авиақатнови билан Ўзбекистонга кузатиб қўйилган.
Изоҳ (0)