Birlashgan Arab Amirliklarining Dubay shahrida qiyin ahvolga tushib qolgan fuqaro O‘zbekiston bosh konsulxonasi xodimlari ko‘magida bugun vatanga qaytarildi, deb xabar bermoqda “Dunyo” AA.
Maʼlum bo‘lishicha, O‘zbekistonning Dubaydagi bosh konsulxonasiga ushbu shahardagi “Al Rashid” shifoxonasida davolanayotgan M.A. vatanga qaytish masalasida amaliy yordam so‘rab murojaat qilgan. Vakolatxona xodimlari ushbu murojaat asosida mazkur shifoxonada bo‘lib, shifokorlar bilan uchrashdi.
Unda maʼlum qilinishicha, 2023-yil 1-iyul kuni fuqaro sog‘lig‘idan shikoyat qilib, Dubai Hospital’ga murojaat qilgan. Sog‘lig‘i yomonlashgani tufayli u keyinchalik “Al Rashid” shifoxonasiga o‘tkazilgan.
Olib borilgan o‘rganishlarga ko‘ra, fuqaro 2020-yil 14-yanvar kuni BAAga sayyohlik vizasi asosida kelgani, ayni paytda mamlakatda noqonuniy turgani, shuningdek, noqonuniy yashab kelayotgan muddatda umumiy miqdori 90 ming dirham (24 800 dollar) qarzi borligi, mazkur qarzni to‘lamagan taqdirda BAA hududini tark eta olmasligi aniqlangan.
Bosh konsulxona xodimlarining BAA huquqni muhofaza qiluvchi va tegishli organlari bilan olib borgan muzokaralari natijasida M.A.ning barcha qarzlaridan voz kechilib, yuzaga kelgan barcha muammolar bartaraf etilgan.
5-avgust kuni M.A. O‘zbekiston diplomatlari, BAAda istiqomat qilayotgan faol o‘zbekistonliklar va “Ayollar va bolalarga yordam ko‘rsatish markazi” xayriya tashkiloti ko‘magida Dubay—Toshkent aviaqatnovi bilan O‘zbekistonga kuzatib qo‘yilgan.
Izoh (0)