Дунё ва ўзбек спортига оид 6 июль тонгининг муҳим хабарлари дайжести билан танишинг.
Ўзбекистон
Тожикистонда «CAFA U-17 Women’s Championship—2021» мусобақаси давом этмоқда. Ўзбекистон U-17 аёллар терма жамоаси 2-турда Эрон вакиллари билан кураш олиб борди. Лейла Рустуллаеванинг дубли ўзбекистонлик қизларга ғалаба келтирди. Аввалроқ Ўзбекистон мезбон жамоага қарши ўйинда дуранг қайд этганди.
Жаҳон
Евро—2020 ярим финал учрашувлари старт олади. 6 июлдан 7 июлга ўтар кечаси Италия ва Испания ўртасида дастлабки ярим финал баҳси бўлиб ўтади. Эртаси куни эса Англия ва Дания масалага ойдинлик киритади. Ҳар икки ўйин 00:00 да бошланади.УЕФА Евро—2020 ярим финал ва финалида фойдаланиладиган тўпни намойиш қилди. Тўп Лондон тимсоллари билан қопланган — ҳал қилувчи учта ўйин айнан ўша ерда бўлиб ўтади.
Италия терма жамоасининг Европа чемпионатида кашфиёти Леонардо Спинаццола муваффақиятли операция қилинди. Аввалроқ футболчи мусобақа чорак финалида Бельгия қарши ўйинда товон пайларини шикастлаб олган ва узоқ муддатга сафдан чиққанди.
Копа Америка—2021 нинг дастлабки ярим финали бўлиб ўтди ва Бразилия терма жамоаси Лукас Пакетанинг ягона голи эвазига Перуни мағлуб этиб, финалга йўл олди. Тите шогирдлари ҳал қилувчи баҳсда Аргентина — Колумбия учрашуви ғолиби билан куч синашади.
Goal нашри «Олтин тўп»га даъвогарлар рейтингини янгилади. Унга кўра, Унга кўра Аргентина терма жамоаси ва «Барселона» клуби ҳужумчиси Лионель Месси етакчига айланган. Аввалроқ Месси 6-ўринда бораётганди. Рўйхат билан танишинг:
1. Лионель Месси («Барселона», Аргентина);
2. Роберт Левандовски («Бавария», Польша);
3. Нголо Канте («Челси», Франция);
4. Ромелу Лукаку («Интер», Бельгия);
5. Килиан Мбаппе («ПСЖ», Франция);
6. Кевин де Брюйне («Манчестер Сити», Бельгия);
7. Криштиану Роналду («Ювентус», Португалия);
8. Раҳим Стерлинг («Манчестер Сити», Англия);
9. Эрлинг Ҳоланд («Боруссия Д», Норвегия);
10. Неймар («ПСЖ», Бразилия).
Роберт Левандовски мухлислар танловига кўра «Бавария»нинг 2020/21 йилги мавсумдаги энг яхши ўйинчиси деб топилди. Польшалик футболчи овозларнинг 76,8 фоизига эгалик қилган. Кейинги ўринлардан Томас Мюллер (10,3%) ва Йозуа Киммих (6,9%) жой олди.
Бразилиялик ярим ҳимоячи Матеус Фернандес «Барселона»ги судга беради. Аввалроқ каталон клуби ўйинчи билан шартномани бир томонлама бекор қилганди. Marca хабарига кўра, Фернандес клубнинг бу ҳаракатидан норози бўлган ва «Барса»ни судга бермоқчи. «Барселона» футболчини 2020 йилнинг ёзида «Палмейрас»дан 7 миллион евро эвазига сотиб олганди.
Гап шундаки, каталонлар Лионель Месси билан янги шартнома имзолаш ва бошқа трансферларни амалга ошириш учун футболчиларини сотиши ёки маошлар ведомостини қисқартириши керак. Шу сабаб жамоа Френандес билан шартномани бекор қилди. Бу ишни Самюуэль Умтити ва Миралем Пьянич билан ҳам қилмоқчи. Бироқ франциялик ва босниялик футболчилар бунга рози бўлмади. Умтити бу иш амалга ошса, ФИФАга арз билан чиқишни хоҳлаётгани ҳақида хабарлар янграганди.
Формула-1 бўйича етти карра Жаҳон чемпиони Льюис Ҳемилтон Mercedes билан 2023 йил охирига қадар мўлжалланган шартнома имзолади. Хабар қилинишича англиялик пойгачи бу шартнома орқали йилига 55 миллион доллар даромад топади. Ҳемилтон немис бренди билан 2013 йилдан бери ҳамкорлик қилади.
Изоҳ (0)