Фарҳод ва Ширин мусиқий дуэти продюсери ҳисобланган Ўзбекистонда хизмат кўрсатган маданият ходими, шоир Бобур Бобомурод вилоятларда «сохта Фарҳод ва Ширинлар» пайдо бўлганини маълум қилиб, мазкур ҳолатни бачканалик деб атади. Бу ҳақда у журналист Феруз Муҳаммадга берган интервьюсида айтиб ўтди.
«Самарқанд ва Жиззах вилоятларида шундай ҳолат юз бергани ҳақида эшитдим. Фарҳод ва Шириннинг Фарғона, Жиззах, Тошкент вилоятларидаги нусхалари ҳақиқий дуэтнинг мусиқаси устидан ўз овози билан қўшиқ айтиб тирикчилик қилиб юрган экан, аммо Самарқандда битта гуруҳ пайдо бўлган — улар ўзларини: ‘Биз ўша Фарҳод ва Ширинмиз’, деб даъво қилиб, умуман меҳнат қилмай, асл Фарҳод ва Шириннинг фонограммаларини қўйиб беришади ва шу аснода оғиз қимирлатиб, турли қилиқлар қилиб туришади. Уларнинг бир-икки видеоси менга етиб келди. Видеода ўзини Ширинман деб таништирган қиз жуда енгил, очиқ-сочиқ кийиниб, ўзини жуда эркин қўйиб юборган экан», — дейди Бобур Бобомурод.
«У қиз жуда енгил, ибосиз кийиниб ‘Мен Ширинман, Самарқандданман’, деб бемалол айтиши жаҳлимни чиқарди. Негаки Шириннинг ўзи очиқ-сочиқ кийиниш ёки бачкана қўшиқларни куйлашни ўзига эп кўрмайди. Мутасадди шахслар, жумладан, «Ўзбекнаво» эстрада бирлашмасининг Самарқанд вилояти бўлимидаги дўстларимиз шу ҳолатга жиддийроқ эътибор берсалар, яхши бўларди... Фарҳод ва Ширин номидан шарқоналик уфуриб туради. Кўпчилик рейтингни ўйлаб, маъносиз қўшиқлар куйлаганида ҳам, Фарҳод ва Ширин бу йўлдан бора олмайди. Чунки бу номни кўтариб юришнинг ўзи бўлмайди. Бу ном остида бўлаётган бачканаликларга эса кўз юмиб кета олмайман», — дея қўшимча қилди Бобур Бобомурод.
Изоҳ (0)