Қашқадарёдаги мавжуд 813 та маҳаллада пойтахт Тошкент шаҳридан ташриф буюрган 200 дан ортиқ санъаткорлар иштирокида байрам тадбирлари бўлиб ўтмоқда. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов хабар берди.
Қайд этилишича, вилоятда санъат ва маданият усталари учрашувлари ўтказилмоқда.
«Давлатимиз раҳбари ташаббуси билан Қашқадарё вилоятидаги мавжуд 813 та маҳаллада маданий-маърифий тадбирлар, ижодий учрашувлар ва концерт дастурларини ўтказиш мақсадида Тошкент шаҳридан 200 нафардан ортиқ таниқли санъаткор ва кино ижодкорлари ташриф буюрган. Вилоятимизга келган эл ардоғидаги санъаткорлар туман ва шаҳарларда бўлиб, Янги Ўзбекистонни бунёд этиш ва бунинг одамлар ҳаётидаги ижобий ўзгаришларини кенг аҳоли қатламига етказмоқда. Маҳаллабай тарзида жонли равишда маданий-маърифий кечаларни бошлаб юборишган. Хусусан, Деҳқонобод ва Қарши туманларида Маданият вазири Озодбек Назарбеков раҳбарлигида таниқли кино ижодкорлари ва санъаткорлар ўз чиқишлари орқали маҳалла аҳлига ҳақиқий байрам кайфиятини улашмоқда», — дейди Аҳрор Содиқов.
Қўшимча қилинишича, санъаткорлар Қарши шаҳри ва Яккабоғ туманидаги нуронийлар ва меҳрибонлик уйларида, шунингдек, жойлардаги оилавий болалар уйларида ҳам бўлиб, кўнгли ўкциклар қалбига қувонч улашган.
«Тадбирлар давомида жойларда миллий киноларимиз намойиши, тасвирий санъат асарлари, миллий либослар ҳамда ҳунармандчилик намуналари кўргазмаси ҳам бўлиб ўтмоқда», — дейди вилоят ҳокимлиги ахборот хизмати раҳбари.
Маданий тадбирлар вилоятда 15 май кунига қадар давом этади.
Изоҳ (0)