Мухлисга хорижий саёҳат йўлланмаси,“комадан чиққан” дўстнинг ташрифи: Нилуфар Усмонова янги альбоми тақдимотини ўтказди (видео)

Хонанда Нилуфар Усмонова 26 январь куни пойтахтдаги меҳмонхоналардан бирида янги альбоми ҳамда “Мусофир аёл” номли қўшиғи тақдимотини ўтказди. Тақдимотга хонанданинг дўстлари, шоу-бизнес вакиллари ва ашаддий мухлислари ташриф буюрди. Хонанданинг таклифига кўра, “Дарё” мухбирлари ҳам тақдимотда иштирок этиб, қизиқарли репортаж тайёрлашди. 

— Бу қўшиқни тўрт йил аввал сотиб олгандим. Уни премера қилиш бугунга насиб этган экан. Бу дунёда мусофирчиликда кун кўриб, болаларини боқаётган аёллар жуда кўп. Ўзим ҳам бир кўз билан бешта болага оналик қиляпман. Мусофирларга осон эмас. Оиласида узоқда юрган аёлларни кўрганда улар ҳақида ёмон хаёлга бориш керакмас. 

Менинг ҳам кўп вақтим фарзандларимдан айро ўтади. Чамадонимни етаклаб, у вилоятдан бунисига боравераман. Бундай чоғда болаларимни қанчалик соғинишимни ва улар менга қанчалик интилишини сўз билан тушунтириб беролмайман. Аммо болаларни ўқитиш ва яхши яшашларини таъминлаш учун ҳаракат қилиш керак. “Мусофир аёл” қўшиғи ана шундай дардларни ўзида жамлаган тарона бўлган деб ҳисоблайман, — дейди хонанда Нилуфар Усмонова.

Тақдимотга хонанданинг шоу-бизнес оламидаги энг яқин дўстлари: Ҳалима Ибрагимова, Шаҳзода Матчонова, Умидахон ҳам ташриф буюрди.

Бундан ташқари, қозоқ, рус ва ҳинд мухлислари ҳам меҳмон бўлишди. Хонанда уларга чуқур эҳтиром кўрсатиб, рақсга таклиф этди. Айниқса, Қозоғистон халқ артисти Алишер Каримовнинг тақдимотга ташриф буюрганини хонанда алоҳида таъкидлаб ўтди.

Бу қўшиқни хонанда нима учун тўрт йилдан буён ижро этмагани ҳақидаги саволга қуйидагича жавоб берди.

— Менимча, бунга тайёр бўлмаганман. Сочим оқариб, дардни ҳис қилганимдан кейин уни ижро этишга аҳд қилдим. Сочимга оқ тушганини яширмайман, бу нур. Югур-югурлар билан овора бўлиб, уни бўяшга ҳам вақтим бўлмаяпти, — дейди хонанда Нилуфар Усмонова.

Хонанда Нилуфар Усмонова саломатлигида муаммоси бор фарзандини ҳеч нарсага зориқтирмай улғайтираётган мухлисасини саҳнага таклиф этиб, уни таништирди. Унга эзгу тилакларини билдириб, фарзанди билан хорижда дам олиш учун икки кишилик саёҳат йўлланмасини тақдим этди. Мухлиса хонанданинг эътиборидан қувониб йиғлаб юборди.

Нилуфар Усмонованинг янги альбоми тақдимотидан тўлиқ репортажни қуйида томоша қилишингиз мумкин: