Қозоғистоннинг биринчи бош вазири, 1991—1994 йилларда ҳукуматни бошқарган Сергей Терешенко вафот этди, деб ёзмоқда Қозоғистоннинг Закон, Орда, Арбат ва NewTimes ахборот порталлари. У март ойида 72 ёшга тўлар эди.
Арбат қайд этишича, Терешенко миллати томондан украин бўлган, лекин ўзини қозоқ деб атарди, ўлимнинг аниқ сабаби ҳозирча номаълум. Собиқ бош вазирининг отаси “ЮКинформ” мухбирига унинг аждодлари Украинанинг Винница шаридан 1920 йилларда кўчиб келгани ҳақида айтиб берганди.
Терешенко 1951 йилда Приморск ўлкаси (Россия) Лесоводск шаҳрида туғилган, 21 ёшида Қозоғистон қишлоқ хўжалиги институтини тамомлаган, сўнгра Чимкент вилоятининг Тюлкубас туманидаги Куйбишев номидаги колхозга бош муҳандис лавозимига тайинланган ва 1975 йилгача шу ерда ишлаган. Ўша йили у комсомол туман қўмитасининг биринчи котиби этиб сайланган ва бу лавозимда тўрт йил ишлаган, шундан сўнг 1983 йилда Ленгер туман партия қўмитасининг биринчи котиби лавозимини эгаллаб, партия поғонасида юқорига кўтарила бошлаган, 1986 йилга келиб эса Чимкент вилоят ижроия қўмитасини бошқарган.
1989 йилда Терешенко Қозоғистон ССР Вазирлар Кенгаши раисининг биринчи ўринбосари лавозимини эгаллади ва кейинги йилнинг февраль—апрель ойларида у Қозоғистон СССР Олий Кенгаши раисининг биринчи ўринбосари бўлди. 1991 йил 16 октябрда республика бош вазири сифатида иш бошлади, 1994 йил 14 октябрда истеъфога чиқди.
Истеъфога чиққанидан кейин, 1998—1999 йилларда Терешенко республика президентлигига номзоди илгари сурилган Нурсултон Назарабоевни қўллаб-қувватлаш Жамоат штабига раҳбарлик қилган, кейинги уч йил давомида ҳокимиятда “Отан” партиясини (кейинчалик номи “Amanat”га ўзгарди) бошқарган.
Терешенко давлатчилик ва суверенитетни мустаҳкамлашдаги алоҳида хизматлари учун Қозоғистоннинг “Қозоғистон Меҳнат Қаҳрамони”, “Барис” орденлари, Россиянинг “Дўстлик” ордени билан тақдирланган.
Изоҳ (0)