Ҳар бир инсон соғлом ва мувозанатли овқатланишга интилади, бироқ баъзи маҳсулотлар бор-ки, улар иштаҳани янада очиб, ортиқча калориялар истеъмол қилишга сабаб бўлади. Келинг, шундай “айёр” маҳсулотлар рўйхатини кўриб чиқамиз.
Картошка фри
Картошка фри ўзида кўп миқдорда ёғ ва крахмал сақлайди, бу эса организмга тезда энергия беради, лекин айни пайтда қондаги қанд миқдорини кескин кўтаради. Шундан сўнг, қанд миқдори тез тушиб кетади ва танангиз яна очлик ҳиссини сезади. Бундан ташқари, картошка фридаги туз миқдори ҳам муҳим рол ўйнайди – у таъбни шунчалик жозибали қилади-ки, сиз тўхтамай яна истеъмол қилгингиз келади.
Газланган ичимликлар
Газланган ичимликлар таркибидаги юқори фруктозали сироп туфайли организмда лептин (тўқлик гормони) даражаси пасаяди. Натижада, танангиз очлик ҳиссини йўқотиш ўрнига, яна овқат талаб қилади. Бундан ташқари, газланган ичимликларнинг нордон ва ширин таъми ширинликларга бўлган иштаҳани янада оширади.
Драже конфетлари
Ушбу рангли конфетларнинг устки қисмидаги ширинлик таркибида маккажўхори сиропи мавжуд, бу маҳсулот аслида аллақачон тақиқланган бўлиши керак эди. Бу шакарнинг энг арзон ва энг зарарли туридир. У ҳам лептин гормонига таъсир қилади ва иштаҳани очиб юборади. Шунингдек, кўпгина драже конфетлар ёрқин рангларга эга бўлиши учун сунъий бўёқлардан фойдаланилади.
Рафинадланган углеводлар
Бу углеводлари қайта ишланган маҳсулотлар бўлиб, улардаги ўсимлик толалари, витаминлар ва минераллар олиб ташланган бўлади. Улар кўпинча тез ҳазм бўлиб, қондаги қанд миқдорини кескин оширади. Янги пишган оқ нон, макарон, хлопялар шулар жумласидандир.
Пишлоқли маккажўхори қаламчалари
Кийимларингизда сариқ ва оловранг доғлар қолдирадиган ўткир таъмли бундай газаклар енгил бўлганлиги сабабли зарарсиз кўринади. Аммо қаламчалар таркиби фақатгина туз, шакар ва ёғлардан эмас, балки кимёвий таъм кучайтиргичларга ҳам бой. Улар иштаҳани очиб юборади.
Музқаймоқ
Энг хавфли музқаймоқ бу тузланган карамел ёки денгиз тузи қўшилган вариантидир. Ушбу музқаймоқ ширин ва шўр таъм уйғунлиги сабабли таомдан лаззатланиш қамровини кенгайтиради ва мияни янада кўпроқ истеъмол қилишга ундайди.
Начинкали пончиклар
Начинкали пончиклар юмшоқ ва ҳаво каби енгил хамир маҳсулотлари бўлиб, уларнинг ичига мураббо, шоколад, қаймоқ ёки бошқа ширинликлар солинади. Улар кўпинча нонушта ёки ширин газак сифатида истеъмол қилинади. Пончиклар таркибида кўп миқдорда транс ёғлар бўлиб, юрак-қон томир касалликлари хавфини оширади, шакар миқдорининг юқорилиги қандли диабет ва тиш касалликларига олиб келади ҳамда инсулин даражасининг кескин ўзгаришига сабаб бўлади.
Калорияси юқори бўлгани сабабли уларни кўп истеъмол қилиш ортиқча вазн тўпланишига олиб келади ва метаболизм жараёнига салбий таъсир кўрсатади. Бундан ташқари, дўконлардаги пончикларнинг таркибида турли сунъий қўшимчалар, консервантлар бўлиши мумкин. Шу сабабли, пончикларни ейишдан тийилиш тавсия этилади.
Изоҳ (0)