Ҳар бир фильм ортида узоқ ва машаққатли жараён ётади, унинг нозик жиҳатларини ҳатто энг ашаддий томошабин ҳам тасаввур қила олмайди. Масалан, сиз ҳеч ўйлаб кўрганмисиз, нима учун фильм трейлерлари кўпинча том маънода спойлерлар билан тўлиб-тошган? Кино ихлосмандларини қийнаб келаётган шу ва бошқа кўплаб қизиқарли саволларга қизиқиб, жавоб топдик.
- Фильмларни суратга олишда кийимлар йиртилиши ёки ифлосланиши эҳтимоли туфайли бир нечта нусхада тайёрланади. Шунингдек, дублёрлар учун ҳам захира костюмлар зарур. Айтганча, баъзан актёрларнинг шахсий буюмлари ҳам ишлатилади. Бунда статист ёки биринчи даражали юлдуз бўлишнинг фарқи йўқ. Масалан, “Катта Лебовски” фильмдаги Чувак кийган кийимларнинг кўп қисми Жефф Бридгеснинг шахсий гардеробидан эди.
Қўл-оёқлари кесилган саҳналарни суратга олиш пайтида актёр яшил пайпоқ кияди, кейин монтажда унга керакли тасвир қўйилади.
- Мусиқали саҳналар сукунатда суратга олинади, овоз эса монтаж пайтида қўшилади. Суратга олиш жараёнида кўплаб камералардан фойдаланилади ва материални мукаммал овозга эришиш учун монтаж қилиш шунчаки имконсиз. Суратга олиш майдонидаги ортиқча шовқин ҳам халақит беради, айниқса, саҳнада актёрлар ўртасида мулоқот бўлса.
- Фильмларни суратга олишда об-ҳаво маълумотларига таяниш бесамар ва жуда қимматга тушади. Шу сабабли кинодаги иқлим учун сунъий об-ҳаво шароитларини яратишга ихтисослашган компаниялар жавобгардир.
“Ёмғир” эффекти ёнғин гидрантларига уланган шланглардан катта баландликдан пуркаладиган сув ёрдамида ҳосил қилинади.
- Қор, аслида, майдаланган қоғоз ёки пластикдан бошқа нарса эмас. Баъзан янада ҳақиқийроқ кўриниши учун совун асосидаги таркиб қўлланади. Бу таркиб махсус машинадан ўтказилиб, қор заррачаларига айлантирилади. Бундай модда кийимларни ифлослантирмайди ва ернинг сирпанчиқ бўлишига сабаб бўлмайди.
Туманни яратиш учун гликол, суюқ азот ва карбонат ангидрид ишлатилади. Бу моддалар техникаларни бузиб қўймаслиги учун уларга ҳимоя ғилофлари кийдирилади. - Суратга олиш майдончаларида ҳар қандай камера ва телефонлар тақиқланган. Бу фильм намойишидан олдин унинг сюжети ҳақида маълумотлар сизиб чиқмаслиги учун зарур. Бу қоидани бузиш оқибатида ҳатто ишдан маҳрум бўлиш ва “қора рўйхат”га тушиш мумкин — бу сизни ҳеч қачон фильм суратга олиш учун ёлламасликларини англатади.
- Энди актёрлар рол учун ўнлаб килограмм вазн ташлаши ёки бир неча ойлаб спорт залида машқ қилиши шарт эмас. Йўқ, албатта, ҳали ҳам эскича услубда керакли қоматга эришаётганлар бор. Аммо кўп ҳолларда актёрнинг юзи муайян фигурага қўйилади. Актёр Жек O’Коннелга янада ҳорғин кўриниш бериш учун “Бузилмас” ижодкорлари шундай йўл тутишди. “Ватан” сериалида эса актриса Клер Дейнснинг ҳомиладорлигини шу оддий усул билан яширишган.
- Массовка актёрлари бир неча кун давомида бир хил кийимда юришлари керак ва ҳар бир суратга олиш кунидан олдин уларни костюм ёрдамчиси суратга олади. Бу кадрдаги хатоларнинг олдини олиш учун қилинади, чунки бир хил саҳна турли кунларда суратга олиниши мумкин ва жараённи назорат қилишнинг бошқа усули йўқ.
- Бўйни узайтириш учун актёрлар суратга олиш пайтида платформали махсус пойабзал кийишади. Бундай пойабзални Роберт Де Ниро “Ирландиялик” фильмини суратга олишда, Роберт Дауни кичик Шерлок ролида ва Дениел Крейг “Раҳм-шафқат кванти” фильмидаги ҳамкасби Жемма Артертон билан бўйи тенг бўлиши учун кийган. Шу усулда кичик бўйли актрисаларнинг ҳам бўйи узунлаштирилади. Масалан, “Қасоскорлар” фильмида Скарлетт Йоханссон томошабинлар олдида баланд платформали этикда намоён бўлди, гарчи унинг қаҳрамони Қора бева аслида текис тагликли пойабзал кийиши керак бўлса ҳам.
- Дарвоқе, илгари киноижодкорларда томошабинни қизиқтириш учун 2 дақиқа атрофида вақт бўлган бўлса, ҳозир интернет ривожланишини ҳисобга олсак, инсон эътиборини тортиш учун 5 сония вақт бор, холос. Айнан шунинг учун бугунги кунда барча энг ҳаяжонли кадрлар трейлернинг бошига кўчирилади. Ахир бу қимматли вақтдан тўғри фойдаланилмаса, ролик шунчаки биргина ҳаракат билан ёпилади вассалом.
Изоҳ (0)