UZ24 нашри 11 ойлик чақалоқнинг танасидан 12 дона пўлат игнани чиқариб олган Республика шошилинч тиббий ёрдам илмий марказининг Болалар жарроҳлик бўлими мудири, профессор Ҳабибулла Оқилов билан интервью уюштирди.
— Ҳабибулла Атауллаевич, танасида бир нечта игналар борлиги аниқланган 11 ойлик гўдак ушбу марказда операция қилингани ростми?
— Ҳа, рост. Республика шошилинч тиббий ёрдам илмий марказининг Фарғона вилоятидаги филиали шифокорлари томонидан 11 ойлик гўдакнинг танасида 15 дона игна борлиги рентген суратларидан аниқланди. Шундан сўнг бола жорий йилнинг 15 январь куни Тошкент шаҳрига олиб келинди. Бу ерда қайтадан рентген қилиниб, текширувлардан ўтказилгач, 17 январь куни бола операция қилинди.
Операция давомида игналарнинг 11 таси, яъни чақалоқнинг бўйин, кўкрак қафасида туриб қолган, ҳаёт учун хавф туғдириши мумкин бўлган игналар олиб ташланди. Қолган игналарни олиб ташлашни эса қон-томир жарроҳлари, кардиохирурглар билан маслаҳатлашган ҳолда кейинроққа қолдирдик. Боланинг аҳволи яхшиланиб, 3—4 ёшга кирганда ҳам операцияни қилиш мумкин. Агар инсон танасидаги ёт жисм халақит бермайдиган жойда жойлашган бўлса, у кўп йиллар давомида безиён турган ҳолатлар учрайди.
— Ҳозир гўдакнинг аҳволи қандай?
— Беморларнинг 3 та даражаси бор: оғир, ўрта оғир ва ўта оғир. Чақалоқнинг аҳволи ўта оғир даражада... Чунки операциянинг ўзи 9 соат давом этди. Катта одамлар ҳам 3—4 соатлик операцияни кўтариши қийин. Лекин, кўз тегмасин, болада бироз бўлса-да ижобий ўзгариш бор, анализлари нормаллашяпти. Операциядан аввал пешоб йўқ эди, ҳозир пешоб келяпти.
— Сизнингча, игналар гўдакнинг танасига қандай тушиб қолган?
— Биз аввалига бола игналарни ютиб юборган, дея тахмин қилгандик. Лекин 8—9 ойлик бола шунча игнани бирдан ютиб юбориши мумкин эмас. Катта одам ҳам ютолмайди буни. Ютган тақдирда ҳам оғиз бўшлиғидан қизилўнгач орқали ўтиб кетган бўлса, қизилўнгачда албатта ўрни қолади. Ўтган жойида яллиғланиш процесси бўлади. Ошқозондан чиқиб кетган бўлса ҳам, ўрни қолади. Лекин эндоскопия қилиб кўрдикки, на қизилўнгачда, на ошқозонда игна ўтган жой йўқ. Яна бир томони шундаки, игналар қизилўнгачнинг юқорисида ҳам, орқа томонида ҳам турибди. Демак, игналар бола танасига тиқилган, деб айтишимиз мумкин. Ким, нима мақсадда бу ишни қилгани эса биз учун қоронғи...
Бир нарсани алоҳида қайд этишни хоҳлардим, бутун дунё болалар хирургияси амалиётида бу каби ҳолат жуда камдан-кам учрайди. Тўғри, бундан аввал ёш болаларнинг турли ўйинчоқ қисмларини ютиб юборган, у ошқозон ва ичакни тешиб ўтган ҳолатлар бўлган. Операция йўли билан уларни олиб ташлаб, соғлом ҳаётга қайтарганмиз. Лекин бунақаси, яъни игна танага ташқи томондан тиқилган ҳолат ҳеч бўлмаган. Бизнинг марказимизда яратилган шароитлар, малакали мутахассислар туфайли мураккаб операцияни амалга оширолдик.
Нашр маълум қилишича, Россияда ишлайди деб айтилган боланинг отаси, шифокорлар сўзларига кўра, ҳодисадан хабар топгач, Тошкентга етиб келган.
Изоҳ (0)