Шифокорлар эндигина 2 ёшни қаршилаётган фарғоналик Самира Тоиржонованинг қорнидан жами 135 та магнит шарчани чиқариб олишди. Бу ҳақида Соғлиқни сақлаш вазирлиги хабар берди.
Маълум бўлишича, қизалоқ магнит шарчаларни ўйнаб юрган ва шу жараёнда улардан анча-мунчасини ютиб юборган. Вақт ўтиши билан шарчалар қорнида йиғилиб қолган ва унинг ҳаётига жиддий хавф солган.
Ота-онаси зудлик билан Республика шошилинч тиббий ёрдам илмий маркази Фарғона вилояти филиалига мурожаат қилади. Текширувлар ўтказилганида қориннинг икки ёнида магнитлар йиғилиб қолгани аниқланган.
Шифокорлар консерватив усулда даволашга киришиб, қайд қилдириш орқали шарчалардан 14 донасини чиқариб олади, аммо аксарияти ичкарида қолаётганди.
Вазият тезкор чоралар кўришни тақозо этарди. Шу боис ота-она болани Тошкент Республика шошилинч тиббий ёрдам илмий марказига олиб келади. Бу ерда гўдак яна бир бор текширувдан ўтказилгач, жарроҳлик амалиёти ўтказилади.
Шифокорлар саъй-ҳаракати билан қизалоқ қорнидаги 135 та магнит шарча олинади.
Тўрт ярим соат давом этган ушбу мураккаб операцияни тиббиёт фанлари доктори, профессор Ҳабибулла Оқилов ҳамда марказнинг Нозим Ўрмонов, Дилмурод Сабиров каби тажрибали мутахассислари амалга оширди.
Айни чоғда қизча ўзини яхши ҳис этаётгани хабар қилинди.
Январь ойининг бошида қозоғистонлик жарроҳлар 4 ёшли боланинг ичакларидан 39 та магнит шарни олиб ташлагани хабар қилинганди. Болалар жарроҳи Салимжон Жакуповнинг айтишича, операция деярли беш соат давом этган.
Изоҳ (0)