Ўзбекистон ахборот-кутубхона соҳасида 45 нафар ходим “Ахборот ва кутубхона аълочиси” кўкрак нишони билан тақдирланди

Бухоро шаҳридаги Ёшлар ижод марказида “ – 2023: Фан, таълим, маданият ва бизнесда Интернет ва ахборот-кутубхона ресурслари” XVI халқаро конференциясининг очилиш маросими бўлиб ўтди. Конференцияда Қирғизистон, Қозоғистон, Озарбайжон, Арманистон, Туркия, Беларусь, АҚШ, Россия, Тожикистон давлатларидан 60 дан зиёд ҳамда мамлакатдан 400 га яқин архивиарус, ахборот-кутубхона раҳбарлари ва ходимлари, шунингдек, бошқа мутасадди соҳа вакиллари иштирок этди.

Бундан ташқари, Нидерландия ва Литва давлатларидан ҳам онлайн тарзда иштирокчилар қатнашди. Халқаро конференцияни ахборот ва оммавий коммуникациялар агентлиги директори А.Ходжаев очиб берди ҳамда барча қатнашчиларни байрамда иштироки билан қутлади. 

“Билим, таълим, мутолаа ва китоблар орқали интеллектуал капитални шакллантирмасдан давлат тараққиётига эришиб бўлмайди. Бугун ахборот-коммуникасия технологияларининг жадал ўсишига қарамай, айнан китоб ва мутолаа жамиятнинг ижтимоий-иқтисодий ҳамда маданий ривожланишининг бош мезони ҳисобланади. Глобал ахборот жамияти ва тезкор ижтимоий ўзгаришлар даврида китобхонлик доимгиданда муҳимроқдир”, — деди агентлик директори нутқи давомида.

XVI Халқаро конференциянинг очилиш маросимида, шунингдек, Бухоро вилоят ҳокими Ботир Зарипов ҳам сўзга чиқиб, Бухоро шаҳрида ушбу халқаро конференциянинг ўтказилаётганидан мамнунлигини таъкидлади ва 3 кун давомида иштирокчиларнинг самарали мулоқотлари йўлга қўйилиш учун Бухоро ҳокимлиги кўмаклашишга тайёрлигини билдирди.

Шу билан бир қаторда, тадбирда Россия давлат кутубхонаси бош директори, Кутубхоналар ассосиацияси ва муассасалари халқаро федерацияси президенти, Озарбайжон, Тожикистон давлатлари миллий кутубхонаси директорлари, Кутубхоналар учун электрон ахборот халқаро консорсиуми директори ва қатор мутасаддилар ҳам сўзга чиқди.

Очилиш маросимида Ўзбекистон ахборот-кутубхона соҳасида узоқ йиллар давомида самарали фаолият юритган, ёш салоҳиятли кадрлар тайёрлашда муносиб ҳисса қўшган ҳамда миллий-маданий меросни авайлаб-асрашдаги юқори хизматлари учун 45 нафар фидойи ходим “Ахборот ва кутубхона аълочиси” кўкрак нишони билан тақдирланди.

Куннинг иккинчи ярмида хорижий соҳа мутахассислари ахборот-кутубхона ривожидаги тажрибалари ҳақида тақдимотлар қилди.