Ўзгидромет февраль ойи бўйича об-ҳаво таҳлилини эълон қилди.
Унда айтилишича, ўтган февраль ойининг ҳарорат тартиби нотекис бўлди, бундай ҳолат қишнинг охирги ойи учун хосдир. Февраль ойи давомида илиқ тўлқинлар ва совуқ тўлқинлар бир-бири билан ўрин алмашиб туриши кузатилди.
Ўзбекистон ҳудудининг катта қисмида ўртача ойлик ҳаво ҳарорати ўртача кўп йиллик қийматларга яқин бўлиб, фақат Фарғона водийси ҳудудларида одатдагидан 1,5-2 даражага илиқроқ бўлди. Энг илиқ даврларда ҳаво ҳарорати меъёрдан 5-8 даражага юқори бўлди.
6-8 февралда республика ҳудудининг катта қисмида кундуз кунлари ҳаво 14-17 даража илиққача, жанубда 19-21 даража илиққача исиди. Февраль ойи учинчи ўн кунлигининг бошида илиқ кунлар кузатилди, бунда ҳарорат 18-21 даража илиққача, жанубда 23-24 даража илиққача кўтарилди.
Февраль ойининг биринчи кунларида, иккинчи ўн кунлиги бошида ва ойининг охирида совуқ тўлқинлар кузатилди, бунда ҳарорат меъёрдан 3-5 даражага, республика шимолида 8-10 даражага пасайди. Ушбу даврларда ҳаво ҳарорати кечалари 0-5 даража совуққача, кундуз кунлари 0-5 даража илиққача пасайди. Республика шимолида совуқ сезиларли даражада бўлиши кузатилди, ҳарорат кечалари 7-10 даража совуққача, айрим энг совуқ кечаларда эса 13-18 даража совуққача, кундуз кунлари 2-7 даража совуққача пасайди.
Февраль ойида бундай ҳарорат қийматлари одатий ҳол деб ҳисобланади. Ўтган февраль ойидаги энг паст ва энг юқори ҳароратлар бутун кузатув тарихи учун ҳам ва ушбу аср учун ҳам февраль ойи қийматлари рекордидан узоқдир.
Қайд этилишича, ҳатто ушбу асрда ҳам шундай февраль ойлари кузатилганки (2008, 2012, 2014 йилларда), унда кечалари ҳарорат 12-17 даража совуққача, шимолда 25-30 даража совуққача пасайган.
Шунингдек, февраль ойида максимал ҳароратлар, айниқса сўнгги йилларда, ўтган ойга қараганда анча юқори бўлади. 2004, 2016 ва 2021 йилларда энг илиқ даврларда ҳаво ҳарорати 25-27 даража илиққача, жанубда 28-30 даража илиққача кўтарилган эди.
Февраль ойида ёғингарчилик нотекис бўлиши кузатилди. Ойнинг охирги беш кунлиги ойлик ёғингарчилик миқдорига катта ҳисса қўшди. Кавказ ҳудудларидан совуқ ва нам ҳавонинг кескин кириб келиши ҳисобига 23 февралда республиканинг шимолида, 24-25 февралда чўл ҳудудларда, 26 февралда Тошкент, Самарқанд, Жиззах, Сирдарё, Қашқадарё ва Наманган вилоятларида қор кўринишидаги кучли ёғингарчилик қайд этилди.
Шу кунларда текислик ҳудудларда баъзи жойларда баландлиги 15-22 см гача бўлган қор қоплами ҳосил бўлди, аммо қор қопламининг давомийлиги жуда қисқа бўлиб, қор 2-3 кунда бутунлай эриди.
Умуман, ҳудуднинг катта қисмида февраль ойи қуруқ бўлиб, ой давомида ёғингарчилик меъёрдан кам (меъёрдан 25% дан 70% гача) бўлиши кузатилди. Фақат ёғингарчилик меъёри жуда кам бўлган ҳудудларда — Қорақалпоғистон Республикаси, Хоразм, Бухоро, Навоий вилоятларида, Сурхондарё вилоятида баъзи жойларда ой давомида ёғингарчилик меъёрдан кўп ва меъёр атрофида бўлди.
Андижон ва Фарғона вилоятларининг ҳудудлари меъёрга нисбатан энг қуруқ ҳудудлар бўлиб, унда ойлик ёғин миқдори меъёрнинг 20% дан кўп бўлмади. Февраль ойида республиканинг тоғли ҳудудларида ҳам ёғингарчилик кам бўлди. Ой охирига келиб, тоғларда қор қоплами баландлиги меъёрдан атиги 40-60 фоизни ташкил этди.
Изоҳ (0)