Jahon oltin kengashi (WGC) ma’lumotlariga ko‘ra, 2025-yil boshida dunyo markaziy banklari oltin sotib olishni faol davom ettirdi. Uning sof xaridlari 18 tonnani tashkil etdi. WGC fikriga ko‘ra, geosiyosiy xavflarning ortishi fonida oltin zaxira sifatida sotib olinayotgani uning strategik ahamiyati yuqori ekanidan darak beradi.
O‘zbekiston Markaziy banki yanvarda 8 tonna oltin sotib oldi. Natijada qimmatbaho metallning xalqaro zaxiralardagi ulushi 82 foizga yetib, 391 tonnani tashkil qildi.
Oltinni eng ko‘p sotib olgan davlatlar orasida ikkinchi o‘rinni 5 tonna bilan Xitoy Markaziy banki egalladi. Yanvar oxiriga kelib, Xitoy zaxiralaridagi oltin hajmi 2285 tonnaga (umumiy aktivlarning 6 foizi) yetdi. Uchinchi o‘rinda esa Qozog‘iston Markaziy banki joylashdi, qo‘shnilar 4 tonna oltin xarid qilgan. Keyingi o‘rinlarda Polsha va Hindiston (har biri 3 tonna), Chexiya (2 tonna) hamda Qatar (1 tonna) joylashdi.
Asosiy sotuvchilar qatoriga esa Rossiya va Iordaniya Markaziy banklari (har biri 3 tonna), shuningdek, Qirg‘iziston (2 tonna) kirdi. O‘zbekiston yanvar oyida oltin eksport qilmagan.
O‘zbekiston oltin-valyuta zaxiralari 2025-yil 1-yanvar holatiga ko‘ra 41,18 milliard dollarni tashkil etdi.
O‘zbekiston nega oltin sotib oldi?
O‘zbekistonning oltin sotishi yoki sotib olishi asosan narxlarga bog‘liq. Markaziy bank oltin narxi oshsa, sotadi, narx pasaysa, sotib oladi.
Ayni paytda bir troya unsiya oltinning narxi 2 ming 900 dollardan balandroqqa baholanmoqda.
Izoh (0)