Хитойнинг BYD конгломерати дунёдаги энг йирик автомобиль ташувчи кема — “Шензҳен” ни сувга туширди. Компания асос солинган шаҳар номи билан аталган кема Шанхайнинг шимоли-ғарбидан уч соатлик масофада жойлашган Янгжоу портига тушди.
Кеманинг узунлиги 219 метр, кенглиги 37,7 метрни ташкил қилади. У бир вақтнинг ўзида 9200 тагача автомобилни ташиши мумкин.
Шэньчжэндаги автомобиль ишлаб чиқарувчи компания 2024 йил январь ойида BYD Exploreр номли автомобиль ташувчи кемани ишга туширган эди. Сўнг декабрь ойида Чангзҳоу кемаси бортида 5000 та электромобиль билан Европага йўл олган. 2025 йил бошида эса BYD компанияси 7000 та автомобиль сиғимига эга Ҳефеи кемасини фойдаланишга топширган.
Куни кеча суднога туширилган BYD Шензҳен — транспорт воситаларини ташиш учун мўлжалланган тўртинчи ва ҳозирда дунёдаги энг катта кема. Компания 2026 йилгача Евросиё ва Шимолий Америка мамлакатларига автомобиллар экспорт қиладиган яна саккизта кемани ишлаб чиқаришни режалаштирган.
BYD расмий сайтида маълум қилинишича, Шензҳен дунёдаги энг хавфсиз ва экологик тоза кемадир. У бир вақтнинг ўзида электр энергияси, суюлтирилган газ ёки кема ёқилғиси билан ишлай олади. Шунингдек, Шензҳен BYD га тегишли аккумуляторлар билан жиҳозланган биринчи кемадир.
BYD компанияси 2024 йилда дунё бўйлаб 417 204 та электромобилни экспорт қилди, бу кўрсаткич 2023 йилга нисбатан 71,9 фоизга кўпдир. 2024 йилда компания бутун дунё бўйлаб 4,25 миллион автомобилини сотган. Айни пайтда компания савдосининг 10% га яқинини экспорт ташкил этади.
Изоҳ (0)