Spot нашри иккита реклама хизмати билан биргаликда Tesla автомобилларига бўлган талаб Ўзбекистонда қандай ўзгариб бораётганини аниқлади.
Давлат статистика қўмитаси маълумотларига кўра, 2020 йилнинг 8 ойида Ўзбекистонга жами 1,7 миллион долларга 73 та электромобиль импорт қилинган. 2019 йилнинг шу даврида мамлакатга атиги 20 та электромобиль импорт қилинган. Қайд этилишича, Хитойдан 50 та, Кореядан 12 та, Германия, БАА, Россия ва Грузиядан 11 та электромобиль импорт қилинган.
Tesla глобал электромобиль бозорида мустаҳкам ўрнашган. Нашр ушбу автомобилга бўлган талаб сўнгги йилларда Ўзбекистонда қандай ўзгарганлигини аниқлашга уринди.
Мамлакатда Tesla’нинг расмий дилери мавжуд эмаслигига қарамай, одамлар унинг электомобилларини шахсий фойдаланиш учун импорт қилмоқда. Баъзи электромобиль эгалари ўзларининг автомобилларини сотувга қўйишга ҳам улгурган.
Avtoelon.uz сайтида автоуловларни сотиш бўйича онлайн реклама хизмати маълумотларига кўра, 2019 йилда сайт орқали 15 та Tesla электромобиллари сотилган. 2020 йилнинг 8 ойи давомида эълонларнинг сони 23 тага етган, шундан 21 та реклама Тошкент, Самарқанд ва Фарғона фойдаланувчилар томонидан жойлаштирилган.Tesla автомобили сотилиши тўғрисида эълонларни Avtoelon.uz сайтига жойлаштирган фойдаланувчилар 2020 йил Model 3’ни энг кўп сотган. Ушбу моделнинг ўртача нархи 680 миллион сўмни ташкил этган.
Шунингдек, эълонларнинг 30 фоиз ўртача қиймати 740 миллион сўм бўлган Model S сотуви учун жойлаштирилган. Энг кам эълон Tesla Х моделини сотиш тўғрисидаги реклама бўлиб, сотувчилар ўртача 930 миллион сўмга ушбу русумдаги машинани сотиб олишни таклиф қилган.
Tesla электромобилларини OLX.uz сайтида сотиш бўйича биринчи реклама ўтган йилнинг июль ойида пайдо бўлган. Сайтда бир автомобилнинг ўртача нархи 932 миллион сўмни ташкил этган.
Йил охирига келиб, сотувга қўйилган электромобилларнинг сони беш баравар кўпайиб, 10 тага етган. 2019 йил давомида сайт орқали америкалик ишлаб чиқарувчининг фақат битта электромобили сотилган.
2020 йилнинг биринчи ярмида OLX.uz сайтида Tesla сотуви бўйича ойига тахминан 10-18 та фаол реклама мавжуд эди. Автомобилларни ўртача нархи 528 дан 605 миллион сўмгача ошган. Июнь ойидан бошлаб сотувлар сони кескин ўсиб, ойига 25 та машинани ташкил этган. Август ойида эса эълонлар сони 29 тани ташкил этган.
Сотувлар сони ҳам ошган. Ёзнинг сўнгги ойида 5 та Tesla эгалари сайт ёрдамида ўзларининг электромобилларини сотган. Аввалги икки ойда ушбу маркадаги учта электромобиль сотилган.
Сайт фойдаланувчилари орасида энг машҳур моделлар Tesla Model 3 ва Model S бўлиб турибди.
Ўзбекистондаги етказиб бериш хизматида «ишловчи» Tesla
Tesla электромобиллари Ўзбекистонда нафақат шахсий, балки корпоратив транспорт воситаси сифатида ҳам фойдаланилмоқда.
Америкалик ишлаб чиқарувчининг электромобилидан фойдаланадиган компаниялардан бири бу Breadly новвойхонаси ҳисобланади.
Муассаса вакилларининг Spot’га айтишича, Tesla Model S электромобиль 2019 йилда сотиб олинган. Аввалроқ, компания франчайзинг савдосидан тушган пулга машина сотиб олганликлари ҳақида хабар берган. Қаттиқ карантин чекловлари даврида харидорларга буюртмаларни етказиб бериш учун электромобилдан фойдаланилган.
«Биз Tesla’ни нафақат электромобиль бўлгани учун, балки компаниянинг сиёсати кўп жиҳатдан бизни ўзига жалб қилгани учун ҳам танладик. Унинг яратувчиси Илон Маск келажакка кўз тиккан ҳолда лойиҳалар яратади ва уларни жуда муваффақиятли амалга оширади», – дейди Breadly вакили.
Электромобилдан фойдаланишнинг афзалликлари қаторида машинани бензинни тежаши, иккита юкхонаси борлиги ва автомобилнинг эргономик шаклини санаб ўтилган.
Камчиликлари сифатида эса машинанинг ниҳоятда шовқинсиз ҳаракатланиши келтирилган. Баъзида шу сабаб машинани пайқамаган пиёдаларга сигнал чалишга тўғри келиши айтилган.
Изоҳ (0)