Gruziya bosh vaziri Irakliy Garibashvili boshchiligidagi hukumat delegatsiyasi 2022-yilning 18-iyul kuni Toshkentga keldi. Martabali mehmonni aeroportda O‘zbekiston bosh vaziri Abdulla Aripov, O‘zbekiston bosh vazirining o‘rinbosari — Investitsiyalar va tashqi savdo vaziri Jamshid Xo‘jayev va boshqa rasmiy shaxslar kutib oldi.
Tashrif “Yangi O‘zbekiston” bog‘iga borish bilan boshlandi, I.Garibashvili O‘zbekistonnig qadim tarixi va yorqin bugungi kuniga hurmat tariqasida Mustaqillik monumenti poyiga guldasta qo‘ydi.
Delegatsiyaning navbatdagi yo‘nalishi Texnopark bo‘lib, u yerda mehmonlar ishlab chiqarish jarayoni, mahalliylashtirilgan yuqori texnologiyali mahsulotlar turlari bilan tanishdi.
O‘zbekiston Gruziyaga asosan sanoat tovarlari, kimyo mahsulotlari, ichimliklar, avtomobillar va transport uskunalarini yetkazib beradi. Gruziya, o‘z navbatida, farmatsevtika mahsulotlari, transport uskunalari, oziq-ovqat mahsulotlari va boshqa mahsulotlarni import qiladi.
O‘zbekiston hududida Gruziya kapitali ishtirokidagi 69 ta korxona faoliyat yuritmoqda. Gruziyada O‘zbekiston sarmoyasi ishtirokidagi 23 ta korxona faoliyat ko‘rsatmoqda. 2017-yildan buyon mamlakatlar o‘rtasidagi tovar ayirboshlash hajmi 34,3 foizga o‘sib, 127,4 million dollarni tashkil etdi.
17 ta zamonaviy, eksportga yo‘naltirilgan va import o‘rnini bosuvchi ishlab chiqarishni birlashtirgan Texnoparkka tashrif chog‘ida Gruziya bosh vaziri mamlakatimizning ulkan investitsion va sanoat salohiyatiga e’tibor qaratdi, shu nuqtayi nazardan, bugungi kunda yangi qo‘shma loyihalarni ishlab chiqish va amalga oshirish maqsadida ikki mamlakat ishbilarmon doiralari o‘rtasida to‘g‘ridan-to‘g‘ri aloqalarni yo‘lga qo‘yish ikki tomonlama hamkorlikning ustuvor yo‘nalishi bo‘lib qolmoqda.
Izoh (0)