Ўзбекистонда 2025 йилнинг январь ўтган йилнинг мос даврига нисбатан кредит қўйилмалари қолдиғи 14,8 фоизга, чакана савдо айланмаси 9,2 фоизга, янги ташкил этилган юридик шахс мақомидаги корхона ва ташкилотлар сони 19,1 фоизга ошди.
Фаолият кўрсатаётган жами юридик шахслар сони 527 мингтани ташкил этиб, йил бошига нисбатан 1,3 фоизга ёки қарийб 7,8 мингтага ошди. Январь ойида мазкур кўрсаткич 2024 йилнинг январь ойига нисбатан 4,3 фоизга ўсди ва унинг умумий ҳажми 55,8 трлн сўмга етди.
Ўзбекистонда кичик тадбиркорлик субъектлари томонидан маҳсулот ишлаб чиқариш ҳажми 24 фоизга ўсди. Мебелчилик саноатида кичик корхоналарнинг улуши 38 фоиздан 57 фоизга етди ва тармоқнинг ўсиш суръати 16,7 фоизни ташкил қилди. Ускунасозликда ҳам кичик корхоналарнинг улуши 53 фоиздан 63 фоизга етди ёки ишлаб чиқариш суръатлари 38,3 фоизга ошди.
Бозор иқтисодиётининг муҳим воситаси бўлган биржа савдоси ҳажмлари тобора ошиб бормоқда. Масалан, январь ойида биржада дизель ёнилғиси савдоси 1,9 баравар, автомобиль бензини 1,4 баравар, минерал ўғитлар 37,4 фоиз, мис катоди 36 фоиз, суюлтирилган газ 18 фоиз ва полипропилен 7,9 фоизга ошди.
Ўзбекистон мис қазиб чиқариш ва уни қайта ишлаш бўйича дунёнинг энг йирик давлатларидан бирига айланиб улгурди. Мис хом ашёсини қайта ишлаш натижасида геофизик кабел ишлаб чиқариш 16 фоизга, маиший кабеллар 15 фоизга, кучланиш кабеллари 8 фоизга ўсган.
Тўқимачилик соҳасида январь ойида маҳсулот ишлаб чиқариш ҳажми 3,6 фоизга ошиб, у салкам 6 трлн сўмни ташкил этди. Электротехника йўналишида 2024 йили ишга туширилган 4 та йирик лойиҳада январь ойида 73 млрд сўмлик маиший техника, трансформатор, қуёш панеллари, қуёш сув иситкичлари каби маҳсулотлар ишлаб чиқарилди.
Чирчиқ кимё технопаркида 19 та корхона томонидан январь ойида 27 млрд сўмлик янги турдаги замонавий маҳсулотлар, жумладан, коррозияга қарши ингибитор, овоз кучайтириш ускуналари, гемодиализ учун тиббий буюмлар, бетон учун махсус қўшимчалар, қишлоқ хўжалиги учун микробиологик препаратлар каби маҳсулотлар ишлаб чиқарилди. 2024 йилнинг январь ойида мазкур 19 та корхона томонидан бор-йўғи 630 млн сўмлик маҳсулот ишлаб чиқарилган эди.
Январь ойида 7,5 млрд кВт/соат электр энергияси ишлаб чиқарилди. Ишлаб чиқарилган электр энергияси учун 2025 йилнинг январь ойида ўтган йилнинг мос даврига нисбатан 100 млн куб м табиий газ ва қарийб 5 баравар кам мазут сарфланди.
Қайта тикланувчи энергия манбаларида электр энергияси ишлаб чиқариш ҳажми ўтган йилнинг январь ойига нисбатан 1,9 бараварга ўсди.
Хизматлар соҳасида 2025 йилнинг январь ойида бозор хизматлари ҳажми 64,8 трлн сўмни ташкил этди ёки ўтган йилнинг мос даврига нисбатан 11,4 фоизга ошди. Хизматлар соҳасида январь ойида 5,7 мингта янги юридик корхоналар ташкил этилди. Январь ойида хизматлар соҳасида фаолият кўрсатаётган корхона ва ташкилотларнинг 68 фоизи кичик тадбиркорлик субъектлари ҳиссасига тўғри келди. 2024 йилнинг январь ойида бу кўрсаткич 60 фоиз бўлиб, бу йилги январь ойида бу улуш 8 фоизга ошишига эришилди.
Жаҳон бозорида шаклланган қулай нарх конюнктураси ҳамда ички иқтисодий фаолликнинг ошиши натижасида Ўзбекистоннинг ташқи савдо айланмаси 2025 йилнинг январь ойида ўтган йилнинг мос даврига нисбатан 7,1 фоизга ортиб, 4,5 млрд долларни ташкил қилди.
Экспорт ҳажми жорий йил январь ойида ўтган йил январга нисбатан 14,1 фоизга оширилди. Бунда, товарлар экспорти 9,8 фоизга ортиб, бу асосан озиқ-овқат маҳсулотларининг 23,1 фоизга ва кимёвий воситаларнинг 22,6 фоизга ортиши ҳисобига таъминланди.
Изоҳ (0)