“Ўзбекистон иқтисодининг келажаги Россия — Украина уруши қандай якунланишига боғлиқ”— иқтисодчи Баҳодир Ғаниев

Ўзбекистонда аҳоли даромадларининг пасайиши ва пул танқислиги кузатилаётгани иқтисодий инқироз келтириб чиқармоқда. Бу ҳақда иқтисодчи Баҳодир Ғаниев YouTube’даги “Нуқталар” лойиҳасидаги суҳбатда айтиб ўтди

Баҳодир Ғаниев фикрича, Ўзбекистон Россия билан ҳаддан ортиқ иқтисодий боғлиқлиги сабаб инқирозга учрамоқда ва бундан азият чекмоқда.

“Иқтисодий инқирозга кирганмиз. Буни кўп иқтисодчилар тан олмайди. Иқтисод ўсяпти-ку, дейишади. Мен буни инқироз ҳолати деб баҳолайман. Сабаби бизда бир йилдан бери даромад пасайиши ва пул танқислиги кузатилмоқда. Шунинг учун бозорларда харид қобилияти тушиб кетган. Одамлар истеъмол даражасини пасайтирган. Буни автомобиль ва уй-жой бозоридаги пасайишда кўриш мумкин. Статистикада ҳеч нарса ўзгармади. Чунки у норасмий даромадни ҳисобга олмайди. Инқироздан азият чекишимизнинг асосий сабаби — Россияга иқтисодий жиҳатдан ниҳоятда боғлиқлигимиздир. Деярли уч йилдан бери кечаётган уруш оқибатида Россия иқтисоди катта зарбалар олди. Санкциялар туфайли мамлакатда бизнес, ишлаб чиқариш ривожланишдан тўхтади. Рубль ҳам уч йилдан бери мувозанатсиз. Россияликлар даромади пасайиб кетди”, деди мутахассис.

Баҳодир Ғаниев фикрини давом эттирар экан, Ўзбекистон тезроқ Россия таъсиридан чиқиши кераклигига урғу берди.

“Инқироз қанча давом этишини ҳеч ким билмайди. Бу биринчи навбатда Россия–Украина уруши қанақа якунланишига боғлиқ. Яъни бизга жуда ҳам керак бўлган Россия иқтисоди қандай аҳволга келиши, ундан санкциялар ечилиши ёки ечилмаслиги, дунё билан алоқаси тикланиши ёки тикланмаслиги масалани ҳал қилади. Россия интенсив урушни чўзиб, катта пулларни урушга сарфлашда давом этса, ўз иқтисодини ривожлантира олмайди. Ички тўлов қобилияти тушиб кетади. У ерда шу аҳвол неча йил бўлса, бизда ҳам шунча бўлади. Бу ҳолат бир томондан Россияга боғлиқлик ва қарамлигимизни камайтириш учун имконият. Биз жон-жаҳдимиз билан бошқа бозорларни топишга киришишимиз керак. Давлат имкон қадар меҳнат мигрантларимизга бошқа бозорлар топишларига ёрдам бериши лозим. Иккинчидан, экспорт бозорларини кенгайтириш зарур. Йирик ва ўрта корхоналар ривожланишига урғу беришимиз шарт. Чунки улар маҳсулотларни экспорт қилиб бера олади. Майда корхоналар савдодан у ёғига ўтмайди”, дея вазиятни таҳлил қилди иқтисодчи.

Баҳодир Ғаниев ҳозирги шароитда мувозанатни сақлаб қолиш учун давлат бюджети харажатларини камайтириш зарарлигини ҳам таъкидлади. Буни давлат корхоналарига субсидия беришни тўхтатишдан бошлаш кераклигини айтди.