Олмалиқ кон-металлургия комбинати 2023 йилда қанча соф фойда кўргани ва 2024 йилда режалаштирилган ишлар бўйича маълумот берилди. Бу ҳақда Миллий матбуот марказида Олмалиқ кон-металлургия комбинати бошқаруви раиси ўринбосари Равшан Мақсумов, бош муҳандиснинг технологиялар бўйича ўринбосари Абдуқаҳҳор Сайназаров иштирокидаги ОАВ вакиллари учун ташкил этилган матбуот анжуманида сўз борди.
Унда сўз олган масъуллар комбинат 2023 йилда 31,7 триллион сўмлик саноат маҳсулоти ишлаб чиқарганини, 1 миллиард 128 миллион 200 минг долларлик инвестиция лойиҳаларини амалга ошириб, 661,9 миллион долларлик маҳсулотлар экспорт қилинганини очиқлади.
Таъкидланишича, комбинатда маҳаллийлаштириш дастури бўйича 429 миллиард сўмлик маҳсулот тайёрланган. Маҳсулот таннархини тушириш бўйича 404,7 миллиард сўмлик натижа қайд этилган.
14,95 триллион сўм маблағ эса бюджетга тўлаб берилган. 6,7 триллион сўм соф фойда олинган. 163,5 миллиард сўмлик геология-қидирув ишлари бажарилган.
ОКМКда инвестициявий лойиҳалар ҳам муваффақиятли амалга ошириб келинмоқда. Хусусан, “Ёшлик-1” лойиҳасининг тоғ-кон мажмуаси бўйича 6 та объект, 3-мис бойитиш фабрикаси бўйича 6 та объектнинг қурилиши якунланган. Янги металлургия мажмуасининг қурилиши бўйича дастлабки лойиҳа ишлари бошланган.
2024 йилда ҳам мазкур йўналишларда олиб борилаётган ишлар жадаллаштирилади. Жумладан, 32,2 триллион сўмлик саноат маҳсулотлари ишлаб чиқарилиб, 2 136,4 миллион долларлик инвестициявий лойиҳалар амалга оширилади. 1 016,6 миллиард сўмлик маҳаллийлаштирилган маҳсулотлар ишлаб чиқарилади. 15,73 триллион сўм маблағ бюджетга йўналтирилиши кўзда тутилган”, — дейди матбуот анжуманида сўз олган Абдуқаҳҳор Сайназаров.
Билдирилишича, “Рақамли ОКМК — 2030” концепцияси бўйича комбинатда ўтган йилда 34 та лойиҳа амалга оширилган.
“Ишлаб чиқариш жараёнларини автоматлаштириш ва замонавий ахборот тизимларини жорий қилиш йўналишида мис бойитиш фабрикаси, мис эритиш заводи, хондиза кон бошқармаси, иссиқлик электр марказида бир қатор ишлар амалга оширилди. МБФда амалга оширилган ишлар натижасида рудадан мис ажратиш даражаси 85 фоизга чиқарилиши таъминланди. Шунингдек, фабрикада технологик жараёнларда иштирок этувчи асосий қурилмалари диагностика тизими (авария ҳолатларини эрта олдини олиш эвазига тўхташлар сонини камайтириш) ҳамда руда-сув жараёнини автоматлаштириш тизими синов тарзда ишга туширилди. Бу йилига 1,8 миллион метр/куб сувни тежайди”, — дейди Равшан Максумов.
Қўшимча қилинишича, кон-транспорт комплекси фаолияти самарадорлигини ошириш ҳамда ахборот технологиялари инфратузилмасини ривожлантириш доирасида “Қалмоққир” ва “Ёшлик-1” конларида кон-транспорт бошқарув тизимининг 1-навбати якунига етказилиб, 99 та автосамосвал, 20 та экскаватор ва 9 та бурғулаш техникалардан махсус аппарат воситалари орқали маълумотларни “онлайн” шаклда жамлаш ва қайта ишлаш йўлга қўйилган.
Темир йўл транспорти соҳасида амалга оширилган рақамлаштириш ишлари натижасида харажатлар йилига 4,8 миллиард сўмга қисқарди. 2023 йилда бизнес ва технологик жараёнларни рақамлаштириш ҳамда уларни мақбуллаштириш эвазига 224 миллиард сўм иқтисод қилинди. 2024 йил давомида бизнес ва технологик жараёнларини рақамлаштиришни жадаллаштириш мақсадида 18 та лойиҳа амалга оширилиши режалаштирилган. Хусусан, “Қалмоққир” ва “Ёшлик-1” конларида ишларни бажаришда тезкор бошқарув тизимини жорий этиш якунига етказилади. Мис бойитиш фабрикасида асосий ускуналарнинг диагностика қилиш ва тегирмонларни руда ва сув билан автоматик таъминлаш “Руда-сув” бошқариш тизимлари жорий этилади. Олмалиқ кон-металлургия комбинати фаолияти самарадорлигини янада ошириш, жумладан рақамлаштиришнинг асосий қисмларидан бири бу — молия, ғазначилик, ишлаб чиқариш ва савдо фаолиятини, шунингдек бизнес жараёнларини ягона ERP тизими орқали автоматлаштириш (маҳсулот таннархини 3 фоизга пасайтириш, даромадларни 2 фоизга оширилиши таъминланади), ишлаб чиқаришни реал вақт режимида назорат қилиш ва тезкор бошқариш мақсадида MEС тизимини ишга туширилади. Бу эса ускуналарнинг фойдали иш самарадорлигини 5 фоизга ошириб, режадан ташқари тўхташ вақти 15 фоизгача қисқартирилади. Янги қурилаётган 3-мис бойитиш фабрикаси ва мис эритиш заводини кенгайтириш лойиҳалари доирасида технологик жараёнларини тўлиқ автоматлаштириш тизимларини жорий этиш истиқболлари белгиланган, — дейди масъул.
Матбуот анжумани давомида масъуллар журналистларни қизиқтирган барча саволларга батафсил жавоб беришди.
Реклама ҳуқуқи асосида.
Изоҳ (0)