Rim Papasi Fransiskning sog‘lig‘i barqaror, biroq “hali ham xavf ostida” deya baholanmoqda. U dastlab ehtiyoj sezgan o‘pka ventilyatsiyasidan uzoq vaqt foydalanmagan, bu esa uning o‘pka funksiyasi yaxshilanayotganidan dalolat beradi. Hozirda u ikki tomonlama zotiljam bilan kurashmoqda.
Vatikan shanba kuni bergan so‘nggi bayonotida Fransiskda endi bronxospazm xurujlari kuzatilmayotgani haqida ma’lum qildi. Shuningdek, unda isitma yoki yangi infeksiya belgilari yo‘qligi, mustaqil ravishda ovqatlanayotgani va nafas yo‘llari uchun fizioterapiya olishni davom ettirayotgani bildirildi.
88 yoshli Papada uzoq vaqt davomida sun’iy nafas olish apparati orqali yuqori oqimli kislorod bilan nafas olgan bo‘lsa ham qon tarkibidagi gaz miqdori normal bo‘lib qolmoqda. Biroq uning sog‘lig‘i bo‘yicha prognoz hali ham ehtiyotkorona baholanmoqda, ya’ni u xavfdan to‘liq chiqib ketmagan, deya qayd etdi Associated Press.
Rim papasining kasalxonaga yotqizilishi
Rim papasi Fransisk joriy yilning 14-fevral kuni bir necha kunlik nafas olishdagi qiyinchilikdan so‘ng yengil isitma bilan Rimdagi kasalxonaga yotqizilgan. Yoshligida o‘pkasining bir qismi olib tashlangan pontifik bir haftadan buyon nafas olish bilan bog‘liq muammolardan aziyat chekmoqda. 18-fevral kuni unga ikki tomonlama o‘pka yallig‘lanishi tashxisi qo‘yilgani ma’lum bo‘ldi. 23-fevral kuni uning ahvoli og‘irlashgan.
2023-yilning mart oyida u bronxit tufayli shifoxonada uch kecha o‘tkazdi. Sog‘lig‘idagi muammolarga qaramay, Fransisk rasmiy uchrashuvlarda qatnashishni davom ettirdi, hatto chet ellarga uzoq safarlarga chiqdi.
2024-yil sentyabr oyida u 12 kun sayohat qilib, Osiyoning jami 4 ta mamlakatiga tashrif buyurdi. Davomiyligi va masofasi nuqtayi nazaridan bu safar uning deyarli 12 yillik faoliyati davomidagi eng uzoq sayohat bo‘ldi.
Izoh (0)