Франция президенти Эммануэль Макрон Рим папаси Францискдан Россия раҳбари Владимир Путинни, Москва ва бутун Россия патриархи Кириллни ҳамда Америка етакчиси Жо Байденни Украинада «сулҳ жараёнини қўллаш»га чақиришни сўраган. Бу ҳақда у Ватиканда понтифик билан учрашувдан кейин маълум қилган.
«Папа Францискни Владимир Путинга ва Москва патриархи Кириллга, шунингдек, Жо Байденга қўнғироқ қилишга чақирдим», — деди Макрон.
«АҚШ Украинада ярашувга эришишни қўллаб-қувватлаш учун музокаралар столига ўтириши зарур — бизга шу нарса керак», — деди Франция президенти.
Унинг сўзларига кўра, Байден ва Рим папаси ўртасида «ҳақиқий ишончли муносабатлар» бор ва у Байденга таъсир ўтказиши мумкин.
Макрон Ватиканга 24 октябрь куни ташриф буюрди ва папа Франциск билан учрашди. Улар дунёда, «айниқса, Украинада тинчликка эришишда кўмаклашиш»ни муҳокама қилди.
Россиянинг Украинага босқини бошланганидан буён Макрон Путин билан энг кўп мулоқот қилган хорижий етакчилардан бири ҳисобланади. 21 сентябрь куни Путин қисман сафарбарлик эълон қилганидан кейин Макрон унинг ушбу қарорини қоралади.
«Урушни тўхтатиш учун ҳамма Путинга максимал босим ўтказиши керак. Унинг сафарбарлик қарори хато, бу рус халқи учун ёмон янгилик бўлди», — деган Франция раҳбари БМТ Бош ассамблеясидаги нутқида.
Аввалроқ Рим папаси Россия ва Украина президентларига мурожаат йўллаб, Путиндан зўравонлик ва ўлимларни тўхтатишни, Зеленскийдан эса тинчлик бўйича жиддий таклифларга очиқ бўлишни сўраган эди.
Изоҳ (0)