Рим папаси Франциск 1 сентябрь куни Мўғулистонга тўрт кунлик ташрифини бошлади, деб хабар беради Duestche Welle.
Қайд этилишича, понтификнинг самолёти маҳаллий вақт билан эрталаб Улан-Баторга қўнган, у ерда Францискни Мўғулистон ташқи ишлар вазири Батмунхийн Батцецег фахрий қоровул сафида кутиб олган.
Аэропортдаги қабулдан сўнг Франциск асли италиялик мўғул кардинали Жоржио Маренго билан учрашган. Франциск Мўғулистонга ташриф буюрган Рим-католик черковининг биринчи раҳбари бўлди. Бу мамлакат аҳолисининг аксарияти буддизмга эътиқод қилади ва 1400 га яқин киши ўзини католик деб ҳисоблайди. Мўғулистон диний жамияти дунёдаги энг кичик жамоалардан бири бўлиб, мамлакатда 25 католик руҳоний ва 33 роҳиба хизмат қилади.
Понтификнинг ташрифи 4 сентябрь, душанба кунига қадар давом этади. Сафар доирасида Мўғулистон президенти Ухнаагийн Хурельсух ва бош вазир Оюун-Эрдене Лувсаннамсрай Франциск билан учрашади. 3 сентябрь куни Россия, Хитой, Жанубий Корея, Таиланд, Вьетнам, Қозоғистон, Қирғизистон ва Озарбойжондан келган диндорлар ҳам қатнашадиган маросимда Рим папаси иштирок этиши кутилмоқда.
Рим папаси Хитойга хабар юборди
Рим папасининг самолёти Мўғулистонга йўл олиб, Хитой узра учиб ўтаётганида Франциск Хитой раҳбари Си Цзиньпингга хабар йўллаган. Пекин бунга жавобан Ватикан билан “ўзаро ишончни” мустаҳкамлаш истагини билдирди. “Хитой Ватикан билан келгуси ҳамкорликка, конструктив мулоқотда иштирок этишга ва ўзаро позицияни яхшилашга тайёр”, — дейди Хитой ТИВ матбуот котиби Ван Венбин. Пекин ва Ватикан 1951 йилдан бери дипломатик муносабатларга эга эмас.
Изоҳ (0)